› 選擇地區
三藩市
紐約
洛杉磯
其他美國地區
香港 台灣 北美
 
2018年01月19日

《降魔的》有望添食
馬國明黃智雯跳舞集氣

最初不被看好嘅情況下推出嘅台慶劇《降魔的》,點知劇集出街後,除咗馬國明被熱捧之外,其他演員好似胡鴻鈞、何遠東、小儀同金剛等等,喺網上都製造咗唔少話題!

今個星期日就係台慶頒獎禮,《降魔的》當然被睇高一線,大家都寄望呢套劇可以有好成績,坊間盛傳視帝係馬明同王浩信之爭!日前呢套劇嘅編審羅佩清(Ruby)喺fb寫咗篇千字文,佢話有好多人問會唔會有續集,Ruby話其實構思嘅時候,已經計劃成為可持續發展嘅系列,o依家已經有初步構思,連劇名都諗叫《降魔的之十字路口》,但係因為有好多唔明朗嘅因素,所以仲未正式落實開拍,所以希望大家可以喺頒獎禮幫佢哋加加油,爭取多啲民意,等公司對開拍續集有信心。

何遠東昨日喺fb貼咗一條短片,背景係用咗《降魔的》主題曲《到處一遊》,之後見到馬國明、黃智雯、胡鴻鈞、何遠東、譚嘉儀、黃子恆、蔣志光、謝雪心同林凱恩,佢哋個個跟住音樂跳舞,但係呢啲舞步睇落好似係揸車嘅動作!跟住何遠東話:「基於要多謝大家對《降魔的》嘅支持,我哋又點可以唔做多少少嘢去報答大家呢?嗱,真係少少少少!又基於一篇千字文岀現,我哋又點可以唔準備少少片花,去吸住大家個睛呢?嗱,條片真係會吸睛㗎!究竟有冇《降魔的之XXXX》,就睇大家啦!」

事後何遠東接受傳媒嘅訪問,講到今次嘅構思,佢話:「其實網民同觀眾一直都好支持我哋,所以我哋咪諗住做番少少嘢, 大家喺個群組用咗極短嘅時間,夾咗一晚,除咗拍片外,大家當食餐飯聚一聚!」

佢仲話蔣老師係今次嘅軍師:「喺拍攝嗰陣佢俾咗好多意見,Mandy係最厲害,佢嚟嗰陣都未知自己要做乜,最後我哋話佢跳舞好叻,咪安排佢去solo!我哋都好感謝團隊,俾咗大家一個咁好嘅旅程!」至於會唔會對頒獎禮有期望,何遠東就話:「咁期望一定會有,希望可以攞到劇集獎,可以開到續集,到時喺十字路口見!」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載