› 選擇地區
三藩市
紐約
洛杉磯
其他美國地區
香港 台灣 北美
 
2018年01月21日

心穎夜會馬明被識破
急坐「降魔的」逃離

黃心穎同唐詩詠昨日出席活動時,事先張揚話要練定馬國明嘅天然呆,仲放風話或者會同馬國明以及家人食飯慶祝29歲生日,原來係真0架!仲係當晚添!

昨日黃心穎去完活動後,先返樂富爸爸嘅屋企,換完衫再返番去自己位於油塘嘅家。約傍晚六點半左右,黃心穎同三家姐黃心慧一齊離開,上的士去到尖沙嘴1881、海利公館嘅凱芸軒食晚飯。兩人約7點15分到達。兩女一路走來似乎唔係好認得路,兜咗個圈先上到去。

傳媒即追問心穎BB同邊個食飯啦?佢就話:「同屋企人,同我慶祝生日。」咁馬國明會到嗎?心穎就不置可否,之後直入餐廳。咁啱門口有一對新人影緊婚紗相,咦,好兆頭喎!

到九點幾左右,心穎BB與家人食完飯,拉隊走人啦,咦,又真係唔見馬明喎……心美心妙心慧心穎四姊妹同雙親仲有姐夫都喺度,一家人企定定俾傳媒影合照,等記者有功課交,真係超級Nice。影完之後心穎仲接受傳媒訪問。問佢馬國明今晚有出席嗎?佢就好肯定咁話:「冇!」

就在心穎BB受訪期間,留守後門嘅記者就發現……馬國明喎!

原來心穎BB用聲東擊西方法,自己「以身犯險」應付傳媒,同一時間安排男友由後門離開避追訪。正準備上「降魔的」嘅馬國明見自己行藏敗露,禁不住露出天然呆個可愛樣……

又去番心穎BB嗰邊,大概嗰陣佢都未知男友已經曝咗光,於是仲同屋企人一行七八人喺1881附近拍照留念,等傳媒可以影多陣,預鬆啲時間俾馬明離開現場……

用心良「甜」呀!

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載