› 選擇地區
三藩市
紐約
洛杉磯
其他美國地區
香港 台灣 北美
 
2018年01月27日

人人問男神 甩票房毒藥信心
子華呻陰功:拍戲搵唔到食

【《蘋果》專訪】【蘋果動搞作】黃子華是觀眾心目中的男神,他與佘詩曼主演下月15日年三十晚上映的賀歲片《棟篤特工》,齊放笑彈。曾被封做「票房毒藥」的子華,今次有信心一雪前恥變回票房靈丹。日前他與阿佘在銅鑼灣接受本報專訪,並在「人人問」中親自解答粉絲的問題,他笑言如大家要他回水,首要親自入場看《棟》片。有人問子華覺得拍戲還是開棟篤笑可以搵食,他大呻:「拍戲對我嚟講,係搵唔到食嘅。」

採訪:蘇美怡

相關新聞:鋪路拍續集咀阿佘

(1)伍小姐: 你有冇信心今次會甩到「票房毒藥」呢個名?

子華:我就不厭其煩解釋一次,電影係有命運㗎!同人嘅命運一樣,所以唔好理,總之做好自己。

(2)黃先生: 一係唔拍戲,一拍就賀歲片,怕唔怕觀眾又嗌「回水」?

子華:嗱!一定要入場,唔入場冇得嗌回水,喺街嗌嗰啲唔當係回水㗎。

相關新聞:【星光熠熠】鄭秀文客串MV

(3)李先生: 係咪專登度個古仔畀自己做男主角,仲要係型嗰隻?

子華:你誤解晒,呢套戲係一啲都唔型仔,你入到戲院就知道係幾咁折墮。
阿佘:唔係啊,我覺得。
子華:今時今日,折墮都俾人話係型啦!

(4)黃先生: 阿佘覺得子華戲外係咪都鍾意搞gag?

阿佘:我覺得佢係幾幽默嘅人,同埋唔發脾氣。
子華:我係大局為重嘅人嚟嘛。

(5)鄧小姐: 鍾意拍戲定係棟篤笑多啲?

子華:咁又真係好坦白同你講啲內心說話,拍戲對我嚟講呢,係搵唔到食嘅, 咁我都做,你話我幾鍾意做呢樣嘢。咁寫呢個戲又寫咗兩年,大佬,好陰功啊拍戲,唔好喊啊!

(6)莫先生: 子華神,可唔可以講句金句嚟聽吓?

子華:哥哥,可唔可以畀啲錢嚟使吓?我搵食㗎。

(7)黃小姐: 我想問幾時再開棟篤笑?

子華:你睇完《棟篤特工》,我就會話你知㗎啦。
阿佘:最重要係可以攞到幾多張飛?
子華:睇下一條題目啊。
阿佘:次次問親你都話冇飛。

(8)吳小姐: 你心目中嘅一代笑匠係邊個?

子華:咁首先許冠文啦,跟住當然就係周星馳啦,喺我哋香港……
阿佘:梗係黃子華啦!
子華:我只係一代嘅男神啫,我係唔屬於笑匠。

(9)林小姐: 我想問吓,今次套戲有冇滿足觀眾要求除褲呢?

阿佘:嘩!你有曾經咁樣提過咩?
子華:嗱,呢個真係絕對滿足到你喇,喺套戲裏面,唔單止除褲咁簡單,係除咗好多嘢。

(10)廖先生: Poster上面條腿係咪真係你(佘詩曼)嚟㗎?

阿佘:我條腿梗係靚好多啦,邊有咁黑啊?其實點解你唔搵我影番呢?
子華:講真我係未見過你條腿係點㗎喎。

(11)姚先生: 阿佘覺得最型嘅男演員係邊個?

阿佘:梗係發哥啦!
子華:我都同意。
阿佘:你係第二型。
子華:嘩,已經好褒獎。啊!黃發華!
阿佘:哈哈,唔該你啦!

場地提供:Papi of Fashion Walk
化妝:Judy Cheung、江中平
髮型:Helen of Fifth Salon、Seiko of Hair Culture

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載