› 選擇地區
三藩市
紐約
洛杉磯
其他美國地區
香港 台灣 北美
 
2018年01月31日

紅館尾場暖笠笠
周慧敏凍齡秘密:老公錫我囉

周慧敏(Vivian)一連四場「一萬天荒愛未老」演唱會前晚在紅館圓滿結束,Vivian台上台下不停放閃,大讚老公倪震細心又體貼,由Vivian起居飲食到演唱會的愛心暖爐都安排得妥妥當當,令Vivian開心又感動。Vivian前晚一出場對住在場過萬觀眾大讚老公:「我真係好怕凍,好多謝你,老公,未凍就安排咁多暖爐畀我。」

三日就肥番

現年50歲的Vivian在尾場邀得李克勤做嘉賓,出場便問Vivian凍齡30年的秘訣,她笑說:「我怕醜喎!」克勤說:「怕乜肉酸,有幾肉酸!呢度全部都係自己人。」Vivian甜笑回道:「老公錫我囉!」台下的倪震報以儍笑,還感動扮喊。克勤又言:「好彩我老婆喺度。我知倪震好錫Vivian,今晚得9度,後台好似火焰山咁。」Vivian又即刻指着台前兩個暖爐:「台前都有兩個。」克勤藉機大呻:「但係嘉賓房冇囉!」Vivian即說:「你身體好嘛,你點解都keep得咁好!」克勤最後都忍不住說:「我都有老婆錫!」演唱會過後,Vivian在慶功宴接受訪問,她說:「原本107磅,𠵱家99磅,冇刻意減,可能忙,食少咗。」問到老公會否心痛?她說:「老公話我三日就可以肥番。」聲沙的Vivian表示喉嚨上月開始不舒服,又耳仔塞、鼻水倒流,之後Vivian再一次大讚老公:「真係多謝佢,老公好大功勞,從來都係佢照顧我,從第一日識我開始,包括起居飲食,除咗媽咪就係佢,之前係佢下令紅館冷氣調到比正常暖少少,今次演唱會後,我都想學下照顧番佢多啲。」至於老爺倪匡,她說:「佢年紀大,雖然冇嚟都好支持我,又心痛我瘦咗。」
採訪:馬建華
攝影:陳俊強

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載