蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年01月31日

廣告定電影?
黎明「Just to say hi」最經典

11,192

曾經香港嘅娛樂圈五光十色,大家除咗會買碟聽歌追星睇劇之外,就連廣告都令人著迷,好似九十年代四大天王之一嘅黎明,大家諗起嘅一定係佢同電迅商合作嘅一系列「阿May」廣告,當年因為咁身邊都唔知多咗幾多個女仔叫阿May。

本來阿May只係一個好簡單嘅商業廣告,但係意外地當時大受歡迎,所以就出現咗往後嘅一系列作品,而講到阿May,就不得不提今年45歲嘅童愛玲,廿四年前同黎明拍嘅廣告係系列當中第一套落重本嘅作品,兩分鐘嘅廣告片拍到成套電影咁,難怪當年令到童愛玲彈出啦。

除此之外,其實歷年嚟做過「阿May」嘅模特兒,發展都幾好,最紅嗰個,仲係天后級!講緊嘅係韓國女神全智賢,佢都係「阿May」之一,當年個故仔講黎明去天山散心,點知遇上全智賢,嗰個廣告嘅經典對白係「Just to say hi」,講「chok」,其實黎明一早已經做到。

另一個「阿May」,就係楊采妮(Charlie),喺1997年播出嘅廣告,當時Charlie同馮德倫飾演一對姊弟,因為馮德倫反叛出走,黎明為咗去救返對方,上演一幕「要贏人,先要贏自己」嘅笨豬跳,嚇窒馮德倫,最後?當然係奪得美人歸。

而最後一代嘅「阿May」大家仲記唔記得呢?就係喺04年由徐子珊擔任喇,當時子珊已經係港姐冠軍,佢喺廣告當中同黎明出海捕魚,點知黎明爹哋病危,子珊為咗幫黎明可以快啲返出巿區探爹哋,陪跑到碼頭再送黎明出海,有別於一貫嘅男女愛情線,呢條父子親情線都新鮮,不過可惜隨住資訊爆炸嘅新紀元到嚟,大家嘅娛樂唔再只得坐定定睇人播嘅電視,到咗今時今日,更加有好多手法向廣告說不,呢類型嘅廣告就真係難免買少見少。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載