› 選擇地區
三藩市
紐約
洛杉磯
其他美國地區
香港 台灣 北美
 
2018年02月04日

阿徐「潮住」濕平
Eason做廿四孝老公隨傳隨到

錫老婆會發達,睇下陳奕迅(Eason)就知嘞,Eason同老婆徐濠縈不時到大坑開餐,之前《蘋果》都撞過佢哋幾次,日前兩公婆就轉蒲跑馬地,唔使開工嘅Eason仲做埋柴可夫,親自駕駛Cute版車Suzuki Hustler接載老婆,呢架車有11隻顏色,大男人Eason揸嬌俏嘅桃紅色,好鬼矚目。

當日下午約1點幾,《蘋果》記者先發現阿徐獨自現身一間賣有機健康食品嘅店舖,着住over size厚羽絨襯巨型墊膊衛衣嘅阿徐,熱到要將件羽絨半着半除掛喺身,見佢喺店內左揀右揀踎低身,又捉住店員係咁問,之後發現記者都冇黑面,反而戚起嘴角微笑,心情都唔錯。

阿徐喺店內買咗半個鐘,收獲甚豐,離去前電召老公接佢,差唔多等咗成三個幾字,其間無聊用手機玩反拍記者,跟住電話響起Eason隨傳隨到,阿徐接完電話行出門口後左望右望,因為店舖喺街頭,但老公就將架車泊咗喺街尾,阿徐要攞住一大袋嘢行去搵老公。

點解Eason將架車泊喺街尾呢?原來吹神喺街尾遇到一對父子朋友,佢掛住同男友人吹水,又逗吓小男孩玩,所以要勞煩老婆行過嚟,結果阿徐行咗成條街搵老公,去到時Eason都好識做,即係幫老婆攞嘢放車尾,大家喺街頭再同友人吹吓水,傾多一陣之後,Eason幫老婆開車門,阿徐上車時都禮貌同記者揮手拜拜。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載