› 選擇地區
三藩市
紐約
洛杉磯
其他美國地區
香港 台灣 北美
 
2018年02月06日

【馮仁昭四圍超】天佑測試又南麒麟臂

又南(右)噚日即場除外套畀天佑量手臂,力證冇花假。

組合Shine成員黃又南同徐天佑噚日聯同電影《五個小孩的校長》嘅小演員到青衣,為全新戲院擔任揭幕嘉賓,家陣距離下月2日紅館演唱會唔夠一個月,本來瘦猛猛嘅又南,為咗呢個騷操到變筋肉人,佢話:「我都三十幾歲,下次再開都唔知操唔操到,今次留個美好回憶。」

勁到惹假疑雲

不過,有網友質疑膊頭太勁似key圖,又南即場除外套騷麒麟臂,旁邊嘅天佑以手掌量度,真係兩隻手掌都握唔晒,又南驕傲話已經操到六嚿腹肌,而天佑就話:「我鍾意李小龍,所以同又南操嘅方式唔同,希望騷上畀大家睇到成果。」兩人為咗演唱會,加大力度一星期排足七日,可能要到年初一、二先有得唞吓。
又南話一身肌肉得嚟不易,過程辛苦兼要克服心理障礙:「用咗半年時間不停操練,記得頭三日未適應好辛苦,瞓覺都會抽筋扎醒,連手都舉唔起。今次真係去到盡,好想畀歌迷睇到我哋嘅誠意,到時可以用最好狀態見大家,一定眼前一亮。」
撰文:馮仁昭

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載