› 選擇地區
三藩市
紐約
洛杉磯
其他美國地區
香港 台灣 北美
 
2018年02月06日

男友被老闆稱「二打六」
雨僑為愛唔怕入雪櫃

雨僑唔止得個樣靚,仲係香港大學畢業生,更加識彈鋼琴,難怪09年出道時會被老闆蕭定一力捧,又出歌又出寫真集,不過其實佢最為人熟悉嘅,係佢自己喺Youtube做嘅美容短片,無論佢喺娛樂圈上打拼成點都好,佢都一路堅持經營佢嘅Youtube Channel。

唔知係唔係因為做慣「網絡人」,雨僑喺現實中都非常敢言,更加試過頂撞老闆,好似當年出道冇耐,喺11年就被《蘋果》踢爆戀上亞視音樂節目《亞洲星光大道》首屆冠軍羅力威,結果老闆蕭定一大動肝火,一向對旗下藝人私生活好寬鬆嘅蕭老闆當年被問及此事時都話:「羅力威又有乜嘢咁好,我絕對唔贊成雨僑同呢啲二打六歌星仔一齊。總之雨僑唔肯斬纜,我就雪硬佢。」而雨僑喺之後出席活動時就坦言:「我唔鍾意人咁稱呼(二打六)我朋友。」

為咗大家同各自經理人公司唔好難做,雨僑同羅力威喺當時好快已經轉為「地下情」,就算同對方同場出現都會避嫌,去到最近幾年先開始慢慢浮面,雨僑就話過:「我哋冇乜故事,其實都係超簡單開心,冇必要話好公開好認定,但我唔會話唔識佢。」而最近雨僑嘅MV當中更加出現咗羅力威嘅身影,正所謂真金不怕紅爐火,愛情經得起考驗先會長久㗎嘛。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載