蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年02月09日
馬上成為壹會員

唔再憎兩個前夫
小雪:教仔女唔好埋怨

【《蘋果》專訪】
原名蔡雪敏的小雪,現年38歲,15年第三度出嫁,與年輕四歲的韓籍老公Robin Cheung再組家庭。早前她帶一對子女返港度假,又與昔日拍檔漢洋敍舊,結果被爆當年走紅的她有脾氣兼經常「跳掣」,小雪亦自認年輕時不夠責任心,但經歷兩段婚姻失敗後,自己成長了也教子女做人不要埋怨,要學會惜福。

相關新聞:【屢敗屢結】第一任丈夫偷食

小雪已是兩個小孩的母親,經過兩段失敗婚姻,三年前嫁年輕四歲的韓籍老公Robin Cheung再組家庭,並於去年12月底飛韓國補辦婚宴,當日小雪穿上韓式結婚服,以韓文宣讀誓言,場面感人。早前小雪趁在澳洲升學的一對子女有長假期,帶二人返港度假兼探望家人及朋友,當中包括當年跟她同一間唱片公司的漢洋,二人還相約到卡拉OK,重唱當年hit爆K場合唱歌《其實我介意》。重看二人當年模樣,小雪不禁大笑,指自己似村姑,又笑漢洋的髮型太搞笑。

從失敗中成長

對於當年為愛情放棄事業,小雪表示沒有後悔,亦不會再憎恨任何人,她說:「如果冇以前嗰兩個人(兩個前夫),我可能唔會成長得咁快,我𠵱家教仔女都係,唔好去埋怨,好似去一間人人話好味嘅餐廳食飯,最後覺得唔好味就下一餐去第二度食過,因為有得食已經好幸福。」小雪續謂,她最開心是一對子女沒有因為沒有生父在身邊不開心,因為從小已經習慣和她一起生活,現任老公亦很疼錫二人。
有指小雪早前在韓國補行禮,用韓文宣誓有點「甩cut」,她笑說:「我嗰個年代鍾意日文㗎嘛,我日文就講到,但韓文真係冇乜興趣,次次想學都想瞓覺,不過嚟緊都會學,冇理由第日結婚十年都仲未識講,反而對仔女都講到喇!」

相關新聞:澳洲絕處逢生

試唱版照出街

漢洋已有一段時間未與小雪見面,訪問當天他憶述當年跟小雪合唱出現一波幾折,七情上臉的他笑指:「佢當年係公司最紅,度佢嘅期真係好難㗎!」在旁的小雪即時否認,笑指自己只是平民百姓。不過,漢洋就爆二人合唱的《其實我介意》,那個版本其實是小雪的試唱版,因為她根本沒時間錄音。漢洋爆料說:「當日大家練習完,練咗一個鐘左右,佢就趕住去拍嘢,之後首歌要出,問監製幾時再錄,點知監製話咪錄咗囉,我就問幾時有錄過呀,原來練嗰次就當錄咗,所以出街嗰個版本其實係試唱版。」
小雪再被漢洋爆當年經常「跳掣」,還會發脾氣,但她卻表示其實不太記得,但承認年紀小,責任心不夠。她說:「嗰時只係覺得打份工,甚至唔當自己係一個歌手,只係覺得有啲簡單嘅嘢,點解做咁耐,係好唔想做咁耐嘢咁,做咗阿媽諗法當然唔同晒,有人同我講番我以前做嘅嘢,我都唔信自己會咁做。」
採訪:小米
場地提供:RedMR紅人派對
化妝:Heidi Lee of Heidi-Makeup.com

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載