› 選擇地區
三藩市
紐約
洛杉磯
其他美國地區
香港 台灣 北美
 
2018年02月25日

手術後死頂連撐兩騷做嘉賓
林利切11cm腸腫瘤「𠵱家講嘢都冇氣」

現年51歲的前小虎隊成員林利,原來去年不幸患上直腸癌第三期,上月尾做完手術切割11cm腫瘤後,林利仍堅持為前小虎隊隊友胡渭康及恩師黎小田演唱會擔任嘉賓,認真有情有義。正在休養的林利昨表示:「𠵱家講嘢都冇氣。」但他仍處之泰然說:「我唔覺得係一件好大嘅事,一樣正常生活。」

相關新聞:照上台唱歌 黎小田感動

參加第一屆華星新秀出身的林利,08年回歸無綫拍劇後曾轉投王維基的港視,至去年11月再加盟邵氏旗下。本月2日,林利為前小虎隊隊友胡渭康個唱擔任嘉賓又唱又跳,胡渭康並一度在台上說:「佢真係好兄弟,今日病,割完包皮都撐我,你今日唔好咁用力。」至月中又為恩師黎小田紅館演唱會擔任嘉賓,健康狀況看來沒有異樣,但原來林利去年10月發現患直腸癌,上月尾才入院做手術切除腫瘤。

食中藥慢慢調理

昨日有周刊報道,林利半年前發現大便出血,最初自我安慰是痔患,豈料檢查後發現是直腸癌第三期。訪問中,林利透露上月24日在聯合醫院做手術,本來在腹部開了四小洞做微創,但由於腫瘤太大,超過11cm,不能做微創,最後要像孕婦般剖腹,幸手術十分順利,花費僅600元,並於上月29日出院。
記者昨致電林利,問到康復情況時,他聲線有點微弱說:「𠵱家OK喇,冇乜嘢,康復緊。我係嚿年10月照大腸時發現,我係唔驚嘅,而且我係信佛,生死對我係另一件事。」林利指自己平日有行山運動,飲食亦十分小心,但竟然也會得到此病:「我覺得係有啲安排。上個月24號開刀,因為我個手術係大手術,要一、兩個月埋口,但一開完刀我就攬住個肚做嘢,其實我係行唔到。始終冇咁嘅經驗(做手術),以為開完刀,冇事喇喎,就周圍走,其實就唔得,行幾分鐘已經唔得㗎喇。」
記者問他為何剛做完手術仍堅持做嘉賓時,林利說:「一個係我好兄弟,黎小田就係我恩師,冇佢就冇小虎隊。同埋我哋幾隻歌都係佢寫紅嘅。佢開(騷),撐唔到都要去(唱)。𠵱家可能就要休息吓。就好似女性生仔一樣,一開刀,你就洩晒氣,𠵱家我講嘢都冇氣。」原來林利為免大家擔心,所以一直沒有交代病情,連黎小田亦不知情,他說:「我只係講咗畀胡渭康知,可以忍到,仲可以做。」現時林利毋須接受化療,會專心休養兩個月,他說:「我消耗咗啲體力,同埋𠵱家條腸未必吸收到啲營養,所以個人就消瘦啲,所以慢慢調理、習慣番,可能食吓中藥。」

相關新聞:新秀入行 組小虎隊紅極一時

「唔係一件大事」

問今次大病令他有甚麼體悟時,林利說:「我好早已經領悟,唔係呢個病,因為我自己喺出邊跑江湖,對所有嘢都好透徹,對我嚟講好平常,我唔覺得係一件好大嘅事,因為我覺得係可以處理到嘅,病係相由心生,如果你越覺得佢病就越有病,我就唔當佢一回事,我一樣正常生活。個人完全好平靜,我已經比好多人幸運。」
採訪:魯吉

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載