蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年03月01日

全包出街使費
絕世好女友李佳芯撐男友好多嘢做

21,096

有線幫嘅李佳芯(Ali)喺12年過檔無綫之後,好快已經成為力捧小花,劇集一套接一套,而且仲得到唔少網民嘅歡心,不過呢位小花查實一早已經封咗盤,佢同ViuTV主持男友陳炳銓拍拖多年,雖然男友其貌不揚,再加上事業發展暫時不如女友,但係Ali一直懶理,依然戀得火熱!

今日有周刊報道,Ali近排忙不停,不過都有夾時間同男友撐腳,日前佢哋孖咇行街街,雖然沿途冇乜親熱動作,不過佢哋冇理其他人,邊行邊傾,態度一啲都冇避忌,之後去咗酒樓嘆茶。隔咗幾日佢哋又拍拖出動去shopping兼睇戲,Ali同樣包辦洗費。報道仲話Ali一直好欣賞男友嘅才華,好支持男友創業,所以出街嗰陣會俾晒大部份開支!

Ali其後接受周刊問,佢力撐男友喺幕前幕後都有好多工作,一直都冇停過,大家嘅努力方向唔同,冇得去比較,佢仲話唔明點解會有女尊男卑嘅講法,兩個人相處最緊要舒服同可以溝通。Ali仲話同男友一齊唔算係捱窮,佢唔需要男友一定要有樓,只要喺經濟同思維嘅水平唔相差太遠就可以,況且佢自己都有經濟能力,應該唔會瞓街!

Ali一再否認女尊男卑,陳炳銓就透過經理人回覆《蘋果》,話平時有幫公司嘅劇做導演、監製,同時又係演員,又會喺外面參與一啲舞台演出,亦會開班授徒。至於報道話同王宗堯合作開製作公司,但原來實情係王宗堯冇份,係陳炳銓同幾個朋友開。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載