› 選擇地區
三藩市
紐約
洛杉磯
其他美國地區
香港 台灣 北美
 
2018年03月02日

又嚟自嘲黑歷史
楊冪走歪路:我還是能走回來

大陸當家花旦楊冪有唔少演出機會,不過觀眾對佢嘅感覺好壞參半,昨日大陸傳媒播出專訪,楊冪坦率講出自己對事業及生活嘅睇法,佢一直朝住做好演員嘅道路上不斷努力,佢喺現階段仲會堅持做事保持一顆孩子般嘅心,佢認為保持善良同對表演嘅熱情係最重要。

楊冪於訪問中透露幸好自己入行比較早,可以有機會接觸好多前輩,喺佢哋身上學習到敬業精神,作為演員,楊冪覺得最基本係唔遲到同將台詞背熟,佢回想早年拍戲嘅點滴,當時佢生病都唔敢休息,怕耽誤拍攝進度會被易角,佢堅持每日如常拍戲,但收工後佢就去「打一個吊瓶」,喺醫院瞓一晚,第二日又一朝早繼續開工,諗番起楊冪直言就算o依家有類似情況,佢都仍然願意咁做。

楊冪自爆唔知自己銀行戶口有幾多存款,因為佢每個月都係楊爸俾一筆零用錢作生活費,而卡中到底有幾錢,對楊冪嚟講係一個謎。

楊冪除咗鍾意用蒸面機保濕,佢仲要keep好身材,佢對自己要求都幾高,入演藝圈後,對於自己外表更加苛刻,從十六歲就開始敷面膜,問到多年後,楊冪最想聽到啲咩評價,楊冪笑住講:「我是看她的戲長大的,她怎麼到今天還這麼漂亮啊。」

佢當紅以嚟,一直係大陸熱門搜尋榜嘅「常客」,未知係唔係已經習慣,佢覺上就上,「因為很快就有別的熱搜把你頂下去了」,楊冪坦承出道時年紀較細:「可能我從少到大做過很多所謂的錯誤決定,或者有非常多黑歷史,我就算走過歪路,我還是能走回來,我不怕做錯事,但我願意改正,因為我真的覺得自己不缺黑歷史,然後這也不是一種悲觀。我覺得我也是清楚知道自己是一個甚麼樣的人,所以我不太理會別人給我的人設。」

唔少大陸網民都有一顆「玻璃心」,而楊冪自言有一顆鑽石心,楊冪解釋自己係好坦誠告訴別人,自己有咩想法,但是別人係打唔碎自己嘅堅持。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載