› 選擇地區
三藩市
紐約
洛杉磯
其他美國地區
香港 台灣 北美
 
2018年03月05日

千禧組合同台 at17莫名做嘉賓
Shine恭喜阿嬌嫁人

組合Shine一連兩場「Shine Moment Live 2018」演唱會前晚在紅館完騷,尾場請到Twins和at17做嘉賓,三隊千禧年的組合在台上再度重逢,觀眾興奮到尖叫拆天。擔任壓軸嘉賓的Twins於安哥現身跟Shine合唱《明愛暗戀補習社》,徐天佑和黃又南指Twins比他們早一年出道,笑言要叫蔡卓妍(阿Sa)和鍾欣潼(阿嬌)做前輩。

天佑被讚冇變過

兩子又恭喜快將成為人妻的阿嬌,阿嬌尷尬地笑:「多謝,我都唔知講乜好。」又南就爆料說:「記得之前阿Sa話過我哋第一次見面嘅時候冇打招呼。」阿Sa笑說:「我唔記得有咁講過,你咁記仇。」阿嬌聯手反擊:「咁耐嘅嘢你都仲記得,你真係好記仇。」之後阿Sa自爆天佑很似自己的初戀男友:「我初戀男友好似郭富城。」阿嬌鬼馬說:「天佑靚仔過郭富城,今日係佢主場,佢一定靚仔啲。」
at17則跟Shine合唱《曼谷瑪利亞》,成員林二汶唱完歌後問天佑:「其實我哋唔算好熟,點解會搵我哋嚟做嘉賓?」天佑解釋因大家同期出道,當年僅17歲的盧凱彤笑說:「我當年係未成年嗰個,咁多年嚟你哋都冇乜點變,唔熟唔緊要,得閒打吓邊爐就熟㗎啦。」

唱《祖與占》落淚

尾聲時Shine唱出《祖與占》,又南一度感觸落淚,唱完最後一曲《鼎鼎大名》後,觀眾未肯離開,Shine再上台安哥唱《勁愛你》。完騷後兩人接受訪問表示:「為咗今次演出排練咗幾個月,我哋呢段時間日日見面,𠵱家做完騷,聽日應該會有啲失落。」講到嘉賓at17和Twins,兩子說:「我哋大家係當年商台叱咤組合獎嘅得主,事隔咁多年,於是就想今次一次過邀請晒佢哋嚟出席。」
採訪:曹家誠
攝影:陳俊強

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載