› 選擇地區
三藩市
紐約
洛杉磯
其他美國地區
香港 台灣 北美
 
2018年03月07日

【馮仁昭四圍超】張艾嘉奪AFA終身成就獎

張艾嘉入行40幾年,噚日獲亞洲電影大獎學院宣佈頒發終身成就獎。

亞洲電影大獎學院主辦嘅「第12屆亞洲電影大獎」(AFA),下星期六會喺澳門舉行。噚日大會宣佈頒發「終身成就獎」畀現年64歲嘅張艾嘉,到時佢會親身出席領獎。
演員出身嘅張艾嘉獲行內人尊稱「張姐」,出道作品係73年同許冠傑、王羽合作嘅《龍虎金剛》,不過要數到最為人熟悉,自然係同麥嘉合作嘅《最佳拍檔》系列中飾演嘅差婆。代表作仲有同周潤發合作嘅《阿郎的故事》,演而優則導嘅作品《最愛》,為佢第一次贏到香港電影金像獎最佳女主角,之後再憑《地久天長》喺金像獎封后。

《相愛相親》入圍

入行40幾年嘅張姐話仲有好多香港情同香港事嘅題材想寫:「有時我走到一啲香港嘅老地方,我都會覺得,嘩,好好玩!大家都忘記香港係點樣。大家嚟幾個地方買完嘢就冇喇,但香港仲有好多好可愛地方。做呢樣東西係需要好多資料搜集,否則好多嘢就好表面化,冇意思。我𠵱家睇到好多香港嘅新導演都好出色。我都係覺得大家唔需要用一種好悲哀嘅態度去挖古仔。」張姐上年嘅作品《相愛相親》,同時入圍今屆亞洲電影大獎,分別角逐最佳導演、最佳女主角、最佳男配角、最佳女配角同最佳編劇5個獎項。
撰文:馮仁昭

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載