› 選擇地區
三藩市
紐約
洛杉磯
其他美國地區
香港 台灣 北美
 
2018年03月09日

【馮仁昭四圍超】開騷出新歌
劉浩龍頒獎禮鍊過

劉浩龍下月開騷,祖兒唔會做嘉賓。

劉浩龍下月27號喺旺角麥花臣場館舉行個唱,早前佢喺觀塘接受訪問時話 :「由1月尾開始我已經喺健身教練督促下,密密練習,每日起碼跑八公里然後再做gym,飲食嘅餐單上只得菜、雞胸、蛋白同魚四樣嘢。」佢表示教練有兩位得意門生,一個叫張家輝,一個叫彭于晏,佢話:「相信我好難超越佢哋,但我都唔可以失禮教練。」

冇諗過紅館

今次演唱會劉浩龍講明冇嘉賓環節,所以一定唔會見到容祖兒:「相信入場嘅觀眾都唔介意睇我耐啲。我唔會想將啲舊歌改得太犀利,希望觀眾一聽到首歌嘅前奏就有番嗰份回憶喺度。」今年除咗做演唱會,亦會炮製新歌,喺過程中搵番好多初出道做歌手嘅回憶,劉浩龍話:「所以我同公司講,今年希望全力做音樂工作,雖然中間我要去拍電影,但我都好希望年尾可以出席頒獎禮。」 今次選址旺角麥花臣,劉浩龍有冇諗過去紅館?佢話:「其實冇,我份人一向都好知道自己位置,我唔想人哋話『好啦,還你心願幫你開一場。』我希望大家真係滿意我演出,有口碑、有成績我先至會再考慮。」
撰文:馮仁昭

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載