› 選擇地區
三藩市
紐約
洛杉磯
其他美國地區
香港 台灣 北美
 
2018年03月17日

宮澤理惠戀事多籮籮
激咀中田英壽兼曾被悔婚

下月45歲嘅日本影后宮澤理惠,昨日驚爆同V6嘅39歲成員森田剛已秘密結婚嘅喜訊,據知因話V6粉絲收到Fan club會訊得知偶像結婚,咁樣先令婚訊曝光。



事實上,現年44歲嘅宮澤理惠為日荷混血兒,11歲已擔任雜誌《Seventeen》嘅模特兒,小學六年級已拍廣告,到1989年,年僅15歲嘅宮澤理惠首次主演電影《我們的七日戰爭》,即獲日本電影金像獎新人獎。到16歲時,宮澤理惠正式進軍日本藝能界,而最經典係佢曾全裸寫真集《Santa Fe》,銷量達155萬本,轟動一時。



而宮澤理惠出道多年,感情生活亦十分豐富,佢於1992年同相撲手貴乃花(貴花田)高調訂婚,之後又遭悔婚大受打擊,令女方患上厭食症跌至人生谷底,亦曾被拍得激咀中田英壽成為一時佳話。而宮澤理惠嘅名字亦先後同北野武、DA PUMP主音ISSA等扯上關係,09年宣佈有餡下嫁夏威夷嘅日籍生意人中津博之,可惜3年後已傳出離婚,直至前年年初離婚收場。



當時宮澤理惠未搞妥離婚就先後同男星小久保壽人、舞台劇作家赤堀雅秋鬧緋聞,更被雜誌拍得偕已婚嘅舞台劇拍檔古田新太深夜拖手,繼而被指與古田發展出婚外情關係。直到前年10月,佢被《週刊新潮》踢爆同森田剛嘅戀情,更帶男方返香閨過夜,才令戀情曝光。宮澤理惠同森田剛因拍舞台劇而撻着,更被直擊到沖繩、箱根旅行,愛得甜蜜。

相關新聞:姊弟戀開花結果宮澤理惠再婚嫁森田剛

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載