› 選擇地區
三藩市
紐約
洛杉磯
其他美國地區
香港 台灣 北美
 
2018年03月18日

齊撐最港電影頒獎典禮
華仔港片吹雞 Stephy港女奪女演員獎

【最港電影大獎】港人撐港產片,《蘋果動新聞》今年首辦第一屆「最港電影大獎」,56歲的劉德華和34歲的鄧麗欣(Stephy)分別奪得最港男、女演員大獎,實至名歸。華仔屈指一算已入行36年,多年來熱誠不減,華仔說:「未來日子香港電影有乜用得着嘅,隨時搵我。」

相關新聞:鄧麗欣:每票都係愛

由《蘋果動新聞》主辦的第一屆「最港電影大獎」頒獎典禮,昨日在太古城舉行,頒發六個獎項,資深電影人杜琪峯和吳君如做頒獎嘉賓。有份出席的劉德華憑《拆彈專家》奪得「最港男演員」,該片同時獲「我最喜愛港片」大獎,鄧麗欣則憑電影《空手道》摘下「最港女演員」大獎,新晉導演黃進憑《一念無明》贏得「最港導演」、「最港電影」及「評審團最港大獎」三個獎項。

「用得着隨時搵我」

君如公佈「我最喜愛港片」得主是《拆》片,由有份監製及主演該片的華仔代領,他上台即笑言:「大家都呼之欲出,真係好surprise,導演忙緊電影創作,恭喜佢,亦達到佢嘅目標。」君如跟華仔開玩笑:「你驚喜啲呀,你喊呀!」令華仔哭笑不得。華仔憑《拆》片被封「最港男演員」,他再講得獎感言:「君如都話自己拍咗30年,我電影加電視總共做咗36年,所有青春都喺晒度,我唔係講㗎,我真係做,未來日子香港電影有乜用得着嘅,隨時搵我。」
華仔表示非常支持首屆「最港電影大獎」:「我覺得應該多啲呢啲活動,提醒大家港產片係一直努力緊。同埋睇到今年港產片嘅票房都好好,相信市民都睇到。」賽果評分包括網民投票,華仔說:「其實頒獎嘅最大意義,係可以同睇嘅觀眾接觸,知道觀眾嘅期許,等我哋自己發酵吓,等我哋知道可以點樣做,真係好似拆彈咁,睇吓有乜炸彈要拆,要好果斷。」

相關新聞:黃進下齣作品輕鬆啲

考慮做導演編劇

連奪兩獎的華仔,實至名歸,問到是否增加對金像獎封帝信心?他笑說:「唔可以咁講嘅,始終呢個係觀眾投票,金像獎係有評審。」至於《拆》片可會拍第二集?他續說:「該死嘅角色都死晒,不過香港電影同名唔同故事嘅例子有好多,睇吓可唔可以做到一個系列咁,唔係一定要實質咁拆一個炸彈,情緒上嘅炸彈都可以。」
向來為香港電影貢獻不少的華仔,除斥資開拍電影外,還鼓勵創意工業,05年曾投資舉辦「亞洲新星導」,資助多名亞洲新晉導演實現電影夢,出心出力。問到會否繼續投資開戲?華仔說:「投資電影就好似一個習慣咁,總之有人嚟到我公司,傾得七七八八就去做。不過呢個真係令公司收入有壓力,我喺演員嗰度會賺番返嚟。」他表示會考慮做導演:「除咗導演之外,編劇我都喺度幫手。」另外,司儀問杜琪峯對「最港電影」有何感受?他說:「嚟得太遲喇,咁多人鍾意香港電影!」
採訪:曹家誠、盧妹
攝影:仇志德、陳慧安
場地提供:香港東隅

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載