蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年03月24日
馬上成為壹會員

感激奶奶扶持
謝玲玲離婚傷痛一年

【閃耀人生女人心 謝玲玲系列之5永遠新抱】
謝玲玲嫁入豪門為林建岳相夫教子,可惜,15年的婚姻因王祖賢的介入,95年離婚收場。夫妻情盡,但是謝玲玲與林家感情不變,尤其是奶奶余寶珠,至今他們的婆媳關係,依然親密,謝玲玲更贏得「永遠新抱」的美譽。

學習好榜樣

這位「永遠新抱」認為奶奶余寶珠是貴人,亦是親人:「好重要親人,我成日對仔女咁講,我同我媽咪相處20幾年,跟住同奶奶相處到𠵱家有37年,比自己媽咪更加要親,對奶奶好似對你媽咪一樣尊重。奶奶係好女強人,好叻,我啱啱嫁過嚟,好似個小女人,乜都唔識,跟住佢學咗好多嘢。」
離婚之後,謝玲玲和奶奶情永在:「婚姻係你同對方大家冇辦法繼續落去,但係我啲仔女都係姓林,呢啲血脈冇可能斷。我係離婚,啲仔女、爹哋媽咪冇一齊,但其他嘢係一樣,所以我同奶奶冇必要唔來往,可以繼續呢個親情。我好感恩,佢一路以嚟好支持我,我哋好多冇講,心照,呢個親情好難得。」
謝玲玲遇上婚姻失敗,對她而言是人生最大挫折:「因為我覺得幸福嘅女人最緊要係婚姻,當你冇辦法擁有嗰個時候,就好努力點獨立、生存,將自己人生行去另一面,更加增值自己。」謝玲玲最終因為5名子女,振作堅強:「始終仔女細,每天都必須都要處理,好快就行過去,冇人幫到你。我成日同仔女講,你想開心唔開心,都係自己把握,好似呢杯水,係一半定係冇,都係自己評論。我有一樣好,我永遠諗你擁有好多,呢一生人嚟講,我好滿足,好幸運,淨係婚姻一樣嘢冇咁好,但係人生唔可能十全十美。」

兒孫最重要

婚姻縱使不完美,謝玲玲仍然無悔:「係呀,仲多謝個女生咗兩個孫畀我,所以我覺得好開心。我覺得五個仔女同孫係我一生中最重要。」至於愛情,她坦言:「我都唔記得咗,冇時間諗呢啲嘢。我覺得𠵱家係人生中最開心時候,好滿足現狀,都幾好,其餘啲嘢就順其自然。」
採訪:梁錦雯
攝影:林德雄
場地提供:Beefbar

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載