› 選擇地區
三藩市
紐約
洛杉磯
其他美國地區
香港 台灣 北美
 
2018年04月04日

【馮仁昭四圍超】近十年音樂行業艱難
謝安琪追夢 阿媽冇施壓

去年主演《打死不離3父女》嘅印度影星阿米爾汗(Aamir Khan)喺新作《打死不離歌星夢》夥拍少女新演員薩伊拉華森(Zaira Wasim),透過戲中演欣兒嘅薩伊拉華森當蒙面歌手一夜爆紅,揭示印度女性地位掣肘箇中艱辛經歷。該片廣東話版主題曲《歌星如初》就由人母謝安琪(Kay)主唱。

感動爆喊

Kay話睇呢齣戲時淚崩:「小女孩好想幫媽咪掙脫屋企,好嬲媽咪點解咁懦弱,之後得知媽咪喺阿女未出世前發現BB性別係女仔,所有人叫落咗BB,媽咪逃走後生咗個女,之後再抱返屋企,聽到背後故事好感人即淚崩。呢個係印度幾嚴重問題,男女未平等,好多屋企人發現係女仔都選擇墮胎。雖然係電影情節,但又係每日發生嘅社會問題。」
作為一子一女之母,Kay希望小朋友要有夢想:「我28歲先轉做歌手做音樂,媽咪擘大個口吓咗一聲,諗我會唔會畀星探呃,了解之後佢就放心。點解我咁想做音樂,我諗我嘅音樂為香港印下歷史印記。」佢感謝喺艱苦時期得到母親體諒:「香港近十年音樂行業比較艱難,屋企人唔出聲已經好好,我係屋企獨女,好慶幸媽咪從來冇畀壓力我,有自己空間追夢。」
撰文:馮仁昭

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載