› 選擇地區
三藩市
紐約
洛杉磯
其他美國地區
香港 台灣 北美
 
2018年04月06日

巴辣惡死變鵪鶉
大小姐林淑敏玩那些年

收視一直持續高企嘅處境劇《愛回家之開心速遞》,喺上個禮拜嘅收視成績,直頭撼低晒所有黃金時段播映嘅劇集!一直都好觀眾歡迎嘅大小姐(林淑敏)、宋瑞輝(許家傑),喺昨晚嗰集玩初戀,唔少觀眾睇完預告片嗌好正!

話說昨晚嗰集係講平時做慣巴辣兼惡死嘅大小姐,知道宋瑞輝走咗去重故業陪啲名媛,於是乎假借被逼接受政治婚姻,希望博到宋瑞輝嘅同情,幫佢安排「初戀套餐」嘅服務,最後宋瑞輝應承咗,仲跟足大小姐嘅要求玩那些年!大小姐先係扮學生妹俾做壞學生嘅宋瑞輝調戲,轉過頭又一齊咗去玩滾軸溜冰,跟住又去咗海傍傾心事,成個感覺好鬼old school,但係網民覺得好sweet,仲話好有《我的少女時代》嘅feel,大小姐亦都有喺fb貼相,佢話:「帶我走!#初戀無限feel」

昨日林淑敏接受傳媒訪問,佢話:「最緊要觀眾睇得開心,因為好多大小姐自己嘅幻想都好超現實,希望大家唔會討厭呢個咁瘋狂嘅大小姐!」查實有唔少觀眾都希望大小姐同宋瑞輝可以有結果,佢就話:「其實如果佢哋要一齊,一定有好多困難喺入面,例如大龍生介入、大家身份懸殊等等,呢啲都係反映到社會實況,但係如果觀眾鍾意,相信編劇都會盡力嘅。」

講到許家傑呢個好拍擋,林淑敏就讚不絕口話:「我記得第一次合作有一場講我飲醉酒,嗰日都拍咗一整日,之後佢有send短訊俾我,我都係第一次收到對手感謝嘅口訊,之後我哋每次埋位,都會好留意對方嘅演技,如果有問題會互相提醒,我覺得作為隊友可以咁坦誠,真係好難得!」

許家傑就話:「估唔到林淑敏都一把年紀,但係做少女竟然冇違和感,完全係令我說服,好勁,佢做霸氣嘅大小姐又得,做學生妹又冇問題,睇嚟佢嘅年紀同心路歷程都有一顆少女心!」佢仲話:「我都估唔到大家會咁合拍,好快已經融合咗,拍戲可以遇到好對手真係好難得,佢好肯排戲,又會坐低慢僈傾點做,我真係好多謝佢!」

至於感情發展,家傑話:「我好希望觀眾鍾意呢個咁奇情嘅關係,我覺得幾似現代版嘅羅拔歐與茱麗葉,我當然希望開花結果, 每次睇新劇本有驚有喜,我都好想知佢哋會點,表面上好難喺埋一齊,但係我同好多觀眾一樣,想佢哋可以一齊!」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載