› 選擇地區
三藩市
紐約
洛杉磯
其他美國地區
香港 台灣 北美
 
2018年04月25日

【馮仁昭四圍超】凌文龍送禮𠱁契媽
毛舜筠醉賀奪獎

出爐金像影后毛舜筠(毛姐)同最佳新演員凌文龍等前晚喺銅鑼灣出席電影《黃金花》慶功,擺咗11圍請台前幕後工作人員,毛姐台上抽獎,台下嘅人送上祝福話:「演技繼續大進步,攞完影后再挑戰胡定欣攞視后」,毛姐笑住話:「咁會好忙喎!」

開派對飲香檳

毛姐攞完影后之後去咗日本玩,佢仲自爆日日賣醉:「老公都知,佢知我開心,今次一齊去旅行冇壓力,日日開派對,瞓到兩點先起身,自己醉足四晚,冇壓力好易醉,仲晚晚飲香檳。」做咗影后之後會唔會加片酬?毛姐話:「呢啲問番經理人,最緊要係劇本好。」至於係咪好耐冇加片酬,佢就話:「唔係,適當時候係應該加。」
凌文龍同契媽兼經理人余安安一齊接受訪問,凌文龍話攞獎之後即刻請契媽打邊爐,同埋送咗條絲巾畀佢,凌文龍又話嚟緊想舞台劇同電影兩邊兼顧發展。安安就一邊話契仔亂使錢,一邊笑住話叫佢儲多啲錢,問到凌文龍會唔會加片酬,安安話:「唔係咁樣嘅,最緊要係有好嘅角色,最緊要係有得做,希望同阿仔拍戲,想今年內成事,我做阿媽佢做仔,之後想試吓畀佢做壞人角色。」
撰文:馮仁昭

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載