› 選擇地區
三藩市
紐約
洛杉磯
其他美國地區
香港 台灣 北美
 
2018年04月26日

【add時尚】囝囝要貓老公揀狗
嘉欣動物園:老爺養馬叻

只要感恩,一點小變化也可以很快樂。
李嘉欣家中最近添了新成員,不過,別搞錯是她又有BB,而是新養了一貓一狗,許家由一家三口變成五口之家,老公許晉亨的柴犬,及兒子Jayden養的小白貓,還有養的馬匹,小動物成就小火花,帶來她們一家很多歡樂。

採訪:林妙萍 
攝影:郭賢興
化妝:Omix B
髮型:Nichol Yip OF HAIR
腕錶提供:Audemars Piguet

李嘉欣的動物情緣,婚後應該要數馬匹,許家上下都和賽馬關係密切。她名下的馬匹都以「寶」字命名,由一寶、貳寶、駟寶,到最近的「陸寶」 ,她早前在跑馬地為愛彼女皇盃宣傳時說:「囝囝Jayden就係屋企嘅三寶!」

貓咪好聰明

嘉欣指平日會去馬房探望愛駒,大人細路一齊餵紅蘿蔔。不過,最近家中就有新寵出現,正是嘉欣新養的一貓一狗。「冇諗過再養寵物,囝囝好鍾意貓,要求咗幾年,終於畀佢成功咗。𠵱家係我變咗小貓嘅粉絲,好鍾意佢,覺得好得意。養貓有一種樂趣,要好尊重佢嘅空間,佢哋又好聰明,有啲我哋教狗嘅,狗仔未學識,佢哋就識咗,所以真係好可愛。」她曾謂不會養貓,但變了鏟屎官後,一切卻不同了,更試過被貓咪抓傷手。至於另一隻柴犬,全因結婚九年的老公許晉亨要求,老公樂於放狗、馴狗,嘉欣則未完全享受到,「𠵱家佢幾大隻,我帶佢出去,就係佢一路lead住我,場面好搞笑。」

老爺計數快

許家出名愛馬,跟馬匹淵源也甚深。老爺許世勳養馬超過六十年,由1957年「誘惑」贏得頭馬,到今年1月「獻惑」勝出,成為歷來首位在港取得一百場頭馬的本地馬主。「這個喜訊令我哋一家人都非常興奮又開心。」她透露97歲的老爺養馬叻,心算更叻,「最近一次,喺屋企食飯,佢開電視睇馬,我發現佢計數,無論係計賠率,定其他數字,全部都計得好快,我哋仲喺度按電話計數時,佢已經計完,好快。」許世勳雖已高齡,但依然活躍,「老爺好關心小朋友健康,經常叫我飲多啲紅酒補身,佢個人好年輕,思想好活,好多新鮮事都搭到嘴。」
擁有幸福家庭,嘉欣依然不時出席活動,拍廣告或做代言人等。但她直言近年想法又開始有點改變,「𠵱家好想放啲時間,睇住小朋友成長,所以好多內地工作嘅邀約,我都唔會去做。反而老公工作上有需要,又想我輔助吓,我會想喺佢身邊多啲。」

任大使有私心

李嘉欣連續五年成為愛彼女皇盃大使,今年亦不例外,原來她出任大使有特別使命,「老公有儲錶習慣,我未見過佢冇戴錶出街,佢儲咗好多錶。每年我做大使,佢就會問我:『今年有乜特別?我生日會唔會收到做禮物?」所以我要做定功課,講畀佢聽。」嘉欣指許晉亨對時間及手錶準確度要求很高,亦是一個守時的人,「我都會買畀佢,佢鍾意複雜機芯,但我盡量揀啲budget唔係太高,因為靚錶真係好貴。」
嘉欣兩公婆日本蜜遊時,曾被拍到老公為她執銀杏葉作影靚相道具,嘉欣說:「佢對攝影好有熱誠,技術就過得去啦。」

更多精采時尚內容,盡在 http://add.appledaily.com 。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載