› 選擇地區
三藩市
紐約
洛杉磯
其他美國地區
香港 台灣 北美
 
2018年04月26日

子華棟篤笑
黃牛黨網上晒「磚頭飛」

黃牛喺香港已經係存在多年嘅問題,前日一開售,15萬張棟篤笑門票已經被掃清。開售前黃子華已經講過,寧願見到吉位,都唔好買黃牛:「唔好買!唔緊要嘅。即係如果我做騷有一大段位、一大堆空,最前嗰啲空晒佢…如果我見到好多場都係咁,咁即係證明好多人可能冇買黃牛喎,可能咪做番一、兩場,補番俾呢啲觀眾囉!」佢仲講得出做得到,寧願加場,自己辛苦啲,都盡量爭取多啲飛賣俾觀眾。

不過可惜,偏偏有人為咗一己私利,無視創作者及營運商嘅努力,白白將人哋嘅成果搶走,再高價放售俾有心支持嘅人,在商言商的確係有效嘅銷售手段,但係罔顧道德唯利是圖又啱唔啱?

雖然黃子華已經親自拍片呼籲大家唔好買賣黃牛,但係成效似乎就唔太大,昨日所見,有唔少人將大量嘅棟篤笑門票放喺網上發售炒賣。有一間位於先達嘅手機店,昨晚喺佢哋個fb page貼咗張「磚頭飛」相片,caption係「今日戰績」,都係黃子華棟篤笑嘅門票,日期分別係7月6、21、27同28,仲有一疊最厚嘅,角度問題睇唔到日期。

呢疊「戰績」究竟係點得嚟呢?Post上fb又想點呢?拿,有網民就留言話:「黃子華呼籲,寧願個位吉都唔好益黃牛!」、「關公都幫你唔到」,但亦有網民留言話:「要三張吖唔該!」馬上有另一網民回覆:「唔好幫襯黃牛!」仲將呢個post share咗去黃子華嘅官方fb專頁。

一小時之後,即約晚上十點幾,呢間手機舖就刪post,拒再同大家分享佢嘅「今日戰績」。

而身為亞博指定售票商嘅StubHub上亦都見到有唔少炒賣嘅情況,有人仲出價成萬五蚊一張飛添!

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載