蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年05月03日
馬上成為壹會員

【add專訪】千嬅與兒子 快樂與從容的體會

香港人的快樂指數去年排全球尾七,要生活快樂,真的有這麼難嗎?
44歲的楊千嬅,顯然過得很快樂,事業上,她貴為天后、影后;生活上,她的愛情修成正果,兒子Torres亦快將六歲。
但是,楊千嬅的快樂,是一種狀態,一種歷練進化得來的從容、自在。她說:「我會話自己嘅人生係知足同埋好豐富,呢個豐富唔只係開心,仲包埋衰嘢同痛苦,咁先至平衡。」

採訪:盧妹  
攝影:陳慧安  
服裝提供:Tod's

楊千嬅早前在新加坡接受《add》獨家專訪,問到現階段的她屬人生勝利組?千嬅說:「我唔會咁講,因為一世未去到最後都唔會有輸贏。我𠵱家嘅生活好平衡、好清晰,對生活有種自信,我真心好想分享,𠵱家呢個階段嘅心態。前半生係追求,𠵱家係面對別離,咁講好似好灰咁,不過就係因為別離,所以變得更加珍惜。熟悉我嘅記者朋友,都會感受到我嘅唔同,以前我係好緊張,𠵱家唔係唔緊張,但原來我放開啲,人哋都會舒服啲,身邊做嘢嘅人都開心啲。」
千嬅直言有這種體會,其實是來自兒子Torres:「你陪伴小朋友嘅過程,其實佢都教緊我嘢,佢令我學識將節奏放慢。以前,我以為快就等於優質,乜都要快、乜都好急,但其實可以細緻咁做好件事,先係優質。」她直言會好好珍惜與Torres的親子時間:「姐姐(傭人)係協助,我盡量都自己帶,大咗佢都唔想我喺度啦。」

以家庭為先

早前,千嬅與合作多年而且關係良好的寰亞約滿,轉到老公丁子高新開的經理人公司。千嬅笑指這個決定好明顯是為了Torres:「其實我叫咗丁生好耐,佢先肯幫我手,因為唔想俾人講,但我都要搵個人幫我接洽工作㗎,最緊要係有人接電話同應人哋。」
千嬅續道:「我覺得唔使諗得太難同太複雜,簽婚書嗰刻,個男人就manage埋個女人㗎啦,事業只係人生嘅一部份,我𠵱家絕對係家庭行先,我想個家庭健康開心,咁樣諗,成件事就好合理,係咪先?大家有默契,客戶都覺得爽咗、方便啲。我先生好了解我,所以我好安心,利益嘅嘢be fair就得,冇必要因為佢係我先生而唔同。」

未敢言退休

提到有報道指千嬅要退休,她說:「我𠵱家做嘢,觀眾對我要求會高咗,我都要增值自己。我想做多啲好嘢,有好嘅影響力,因為我得到嘅嘢係呢個社會畀我嘅,唔係唔做,同屋企個時間表計劃得到嘅就做。」

人母的時裝之道

提到這次與意大利品牌Tod's首次合作,楊千嬅直言是真實用家:「我真係會買,佢啲鞋好多details,啲皮又好軟。」至於她的「人母時裝style」?楊千嬅笑謂:「隨住身形而變,弗就乜都得啦。我真心懶,成日運動裝就出街,不過好矛盾,家庭主婦就梗係實用為主,但我另一個身份係女明星,我就用呢個藉口買嘢。人哋儲蔘茸海味,我就儲衫、儲袋,喺屋企得閒就影吓相擺Ig,喺屋企當自己Barbie,個仔成日都見我換衫㗎。」
講起Torres的衣着品味,千嬅謂完全受老公影響:「平時買衫畀佢,都係丁生話事,要襯到啱先買。屋企最多就係costume。我好懶,試過就咁用瓦通紙剪個形,就笠落個仔度,又試過因為唔記得咗準備,求其買支掃把畀佢扮巫婆,佢覺得好核突,不過係得嗰款冇辦法。」

更多精采時尚內容,盡在 http://add.appledaily.com 。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載