› 選擇地區
三藩市
紐約
洛杉磯
其他美國地區
香港 台灣 北美
 
2018年05月03日

捱22年當前最風光
唐文龍數搵朝唔得晚 苦笑內地冇金執

【《蘋果》專訪】
入行22年的唐文龍早前憑劇集《溏心風暴3》,終一嘗爆紅滋味,日前他接受《蘋果》專訪,自言在這段時間的訪問比他一生還多。他更自爆當年不理家人反對做歌手,致「搵朝唔得晚」,又試過冇錢供樓要問家人借錢,曾北上發展的他苦笑道:「大家有錯覺,好似去到內地有金執。」

相關新聞:瘋狂愛做運動唐文龍:冇工開都唔可以意志消沉

現年48歲的唐文龍,入行22年走過不少低谷,足迹踏遍中港台的他,早前憑電視劇《溏心風暴3》一嘗爆紅滋味。日前唐文龍接受本報專訪,他感慨謂:「唔敢講話吐氣揚眉,但呢三、四個月嘅訪問,真係多過我呢一生喺娛樂圈做嘅訪問,斷斷續續連埋電話、電台,五、六十個都唔止。我唔想假裝謙卑,我反而想講,我哋做演員,今日唔知聽日乜嘢事,聽日唔知後日乜嘢事,今日嚟講有人在乎,我好高興,只能享受今日嘅在乎,用呢種力量去面對明天。」
唐文龍自言並非出生富裕家庭,雖然小學舉家移民美國,但家庭環境並不理想:「有段時間媽咪剪supermarket嘅coupon,有乜減價就食乜,細個有埋怨,唔明白點解又係食嗰啲,𠵱家大個懂事,就知生活唔容易。」

畫圖幫補收入

曾經在台灣出過唱片的唐文龍坦言:「當年唔理家人反對做歌手,但搵朝唔得晚,去台灣要兼職幫人畫時裝設計圖,五百、三百一張咁幫啲廠家畫。」之後他回流返港,99年加入無綫,但並未脫貧,住過劏房,也趁樓市低買了樓。他笑笑口說:「都有穩定收入嘅,只係非常唔理想,開頭大約搵五位數一半(即5,000元),但唔好講得過份淒涼,因為大把人都冇。之後有段時間雙生雙旦,三生三旦,收入好啲,只係最尾兩年,自己擺位冇想像中咁,就硬着頭皮出去闖。」
唐文龍曾在內地打滾11年,問他是否覺得內地錢較容易賺?他即苦笑謂:「大家有錯覺,好似去到內地有金執,冇呢回事,佢哋環境大一千倍,但同樣競爭都大我哋一百倍。」他又說:「除咗顧住內地生活費,香港層樓仲要供,試過九個月冇錢供樓,要問屋企人借錢。」
藝人心理質素好重要,唐文龍自爆亦有脆弱時,幾次想過放棄:「做呢行就係一個賭注,行內叫擺自己上枱。始終覺得轉行好困難,半紅不黑,老闆係咪會請你?早轉行嘅人真係好勇敢,走唔到嘅就一定要帶錢入行,冇錢都要盡量儲,要慳,唔好諗住當前風光可以咁落去。」
採訪:嵐山
場地提供:FFG武術健身中心

相關新聞:太窮太奄尖冇戀情

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載