› 選擇地區
三藩市
紐約
洛杉磯
其他美國地區
香港 台灣 北美
 
2018年05月11日

家燕姐獨力照顧三子女
囝囝秘學沖咖啡孝敬媽咪

薛家燕經常喺劇集中演活「媽打」角色,鏡頭前後都係眾人嘅「家燕媽媽」,現實生活育有兩女一子,31歲二仔石耀庭(Jackson)6.11將迎娶25歲女友陳素怡(Zoe),呢對準新人日前就以帶家燕姐往high tea為由,原來Jackson秘密學沖精品咖啡,喺母親節前教敬媽咪。

Jackson知道媽咪近日迷上嘆咖啡,所以佢向咖啡達人Pauline Wong拜師學藝,更同未婚妻合力沖製「藝伎咖啡」(Geisha)給家燕姐品嘗。Jackson由磨豆到蒸餾都親力親為,家燕姐聞到咖啡香,佢即忍唔住話口水湧出嚟,家燕姐下月中先飲新抱茶,但呢一日搶先喝到準新抱Zoe遞上Jackson沖嘅靚咖啡,即使齋啡都甜到漏,家燕姐一口一口飲唔停。

「今日好開心,其實呢排都好開心,佢(石耀庭)話同我飲下午茶傾偈,我都估同我慶祝母親,但諗唔到佢親手沖咖啡我飲,好有心思,好sweet。」家燕姐非常感動。Jackson自爆不時會整嘢食給媽咪:「有煮過餸、整過蛋糕,媽咪賣曲奇,佢鍾意用咖啡襯番,我去學咗5、6堂,希望沖出精品咖啡畀媽咪飲。」Jackson嘅師傅Pauline係咖啡達人,名師出高徒,家燕姐即說:「我真係流晒口水,呢杯係幸福咖啡。」問到家燕姐畀呢杯咖啡幾多分?佢話:「呢個咖啡品種本身已100分,沖咖啡好講功夫同技巧,我畀佢90幾分。」

家燕姐係單親媽咪,辛勞捱大3名子女,問到佢難忘母親節?佢話:「有一年,仔女話全部要見家長,一定要我度期,我心諗學生曳先要見家長,仲要3個輪住見。點知司機車我返屋企,佢哋用紅外線射燈打上牆,寫住『Happy Mother's Day』,跟住兩姊妹輪住拎餸上嚟,整九大簋同我慶祝母親節,甜品仲整咗紫米血燕,用咗成盒燕窩去煮,成萬蚊,好貴!」Jackson尷尬話拎咗媽咪雪櫃珍藏,家燕姐當然冇怪責子女,佢話分開幾餐食:「佢哋見我擺咁耐冇煮,嗰年好大驚喜,今年另一個大驚喜,我好大感動,始終沖咖啡要花時間去學。」Jackson再冧媽咪:「咖啡只係『頭盤』,好戲還在後頭。我娶到一位好太太,我哋嚟緊會一齊孝順媽咪。」咁係咪每個母親節都學整一樣新食品獻媽咪?家燕姐肉赤:「咁又唔使花咁多時間。」

家燕姐好想分甘同味,佢話希望出席囝囝婚禮嘅賓客親友都可以嘆呢杯幸福咖啡,Jackson當日做新郎一定分身乏術,但媽咪咁講,佢答應分身沖嚟招呼親友,並將幸福同大家分享。

場地:Pokka Café

相關新聞:獨力湊大三子女 曾暱廁所爆喊家燕姐寄語兒子:要負責任

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載