› 選擇地區
三藩市
紐約
洛杉磯
其他美國地區
香港 台灣 北美
 
2018年05月14日

【母親節呈獻】
照顧殘障兒子27年 末期患癌母:希望上天畀多半年我

79歲的吳婆婆(威媽),育有三名子女。1991年底,威媽幼子(威仔)在上海因感冒菌上腦而患急性腦膜炎暈倒,生命一度有危險,後來接受開腦手術成功救回生命,但代價換來終身殘障及失去自理能力...

威媽對兒子不離不棄,27年來每天都風雨不改到九龍醫院為兒子餵食、洗澡、抹身,做運動等,威媽憶述當年意外仍倍感憂傷:「當年出事時,威仔只有22歲咋,醫生話救得返都只有三個月至半年壽命。」對於威媽來說,兒子的性命是最重要,她辭掉工作,全天候廿四小時照顧兒子:「我唔放棄,我不停為佢按摩,煲粥畀佢食,沖涼,好似照顧個BB一樣。後來慢慢見佢個嘴開始郁,想講嘢咁,連醫生護士們都覺得好意外,去到第三年嗰時醫生話威仔已經好返70%,無生命危險,連醫生都大讚very good !」

威媽憑着一份執著,不惜一切救回兒子的生命,更創造奇跡,由兒子原本可能只有半年壽命,經過悉心照顧後,雖然仍沒有自理能力,但至少令他活到今天。

但不幸的是,2016年威媽被証實患結腸癌,雖然經過切除手術後慢慢康復,但月前再被發現有復發跡象,而且更出現擴散,生命漸入倒數階段。威媽心情輕鬆地說:「我都唔擔心自己的病,反而擔心威仔之後無人照顧。我已經同咗佢家姐講,如果有咩事的話,叫佢請個人去照顧細佬,我咩都交晒俾個囡了。我問過威仔:『阿媽就嚟上天,無人照顧你喇,點算呀?』佢嘅反應係擰開塊面唔睬我,希望上天畀多半年我,我就可以照顧多佢半年。」

被問到今日母親節會怎樣慶祝?威媽表示會一如以往,到醫院照顧兒子:「佢係我最重要嘅人,我見到佢就最開心,呢個咪慶祝囉,哈哈...

「母愛」之所以偉大,就是不惜一切地為兒女付出,而不求任何回報。
願天下母親,母親節快樂!


記者:吉吉、倩宜
拍攝:吉吉

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載