› 選擇地區
三藩市
紐約
洛杉磯
其他美國地區
香港 台灣 北美
 
2018年05月18日

重拍《倚天》90後擔大樑
邊個角色最唔似

金庸武俠小說過去逾半世紀經常被中港台翻拍成電影同電視,最近又有新爐出嘅金庸電視劇喇,就係又一次由大陸製作嘅《倚天屠龍記》。

係呀,又係張無忌,《倚天屠龍記》前前後後已經有十一次被翻拍嘅戰績,今次呢套最新嘅《倚天屠龍記》主要搵90後演員擔大樑,張無忌由大陸90後小鮮肉曾舜晞飾演,趙敏就係今年20歲、唐嫣旗下藝人陳鈺琪,曾主演《錦繡未央》飾演九公主拓跋迪,令人留下深刻印象,周芷若呢,就由26歲祝緒丹出演,楊冪旗下藝人,去年參演《三生三世十里桃花》飾演玄女,今次可以話係唐嫣門生鬥楊冪門生,而小昭就由嘅香港女子組合「少女標本」成員許雅婷Kabby飾演。

其他角色尚包括殷離,此角由24歲女藝人曹曦月飾演,明道旗下藝人;殷素素則由27歲陳欣予飾演,楊不悔就由20歲孫安可飾演,唔緊要,數完之後都預咗大家唔記得,一眾人名多而難記,二來就算睇圖都未必記得,因為個個氣質相近——差唔多樣咁,喺香港觀眾心目中,最靚,依然係周海媚。

今年51歲嘅周海媚,曾經喺94年馬景濤主演嘅台灣版《倚天》演周芷若,今次佢演嘅滅絕師太,先後有容玉意、王萊、上官玉、李香琴同惠英紅等人演過,周海媚呢個版本就似乎同以往有少少唔同,喺造型上留低唔少女人味,而97年拍《天龍八部》飾演虛竹嘅樊少皇今次就飾演成崑。

相關新聞:電視版第一代滅絕師太上官玉冇戲癮:幾十歲仲拍咩呀

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載