› 選擇地區
三藩市
紐約
洛杉磯
其他美國地區
香港 台灣 北美
 
2018年05月22日

放過自己 軒仔偏執狂解脫

【我們的演唱會】張敬軒將於下月在紅館舉行「HINSIDEOUT」演唱會,他自言會放下偶像包袱做回自己,一個由細到大喜歡整蠱人的性格。軒仔透露有隱性雙子座多重性格,在家會比較憂鬱,但卻喜歡帶歡樂給人,他說:「有啲人嘅快樂好似鍾意SM咁要俾人打,快樂嚟自俾人鞭策,我要得到快樂,先要經歷唔快樂嘅嘢,然後先可以快樂。」

「有壓力嘅唔做」

近年經歷不少朋友離去,令軒仔看透生死,他說:「發現人係減法嚟,要為自己做嘅嘢埋單,所以每日可以好健康擘大對眼,過到自己想過生活,其實已經好幸福。兩三年前開始冇要開幾多場演唱會、賣幾多碟呢啲念頭。歌手最大嘅難關,我諗係點樣去放過自己,相信每個鍾意舞台表演嘅人都有偏執狂,每次表演都要做到最好,但我哋係人嚟,唔係機器可以保證,當表演有失誤或唱得唔好會好自責,覺得自己冇鬼用!𠵱家成日同自己講,有壓力嘅嘢就唔好做,呢行真係冇人逼住你做嘢,冇必要為咗兩餐去做。」

舊歌文化遺產

今次海報引來一個問題「為何要玩燒頭髮」,軒仔笑言現世代的演唱會宣傳,不再局限在攝影棚,為宣傳他會去到好盡,扮騎師麥偉利、扮鄧梓峰拍片搞噱頭等,他說:「做呢行與時並進好緊要,唔可以再做傳統藝人高高在上形式。」他又跟連登討論區網友交談,網友的回應是軒仔的歌似看《名曲滿天星》節目,軒仔解釋:「但我真係聽嗰啲歌長大,我實在鍾意啲歌,如果我哋呢代唔唱,下一代就冇人識嗰啲歌,呢啲係好重要文化遺產,所以佢有佢講,我有我繼續唱。」採訪:皓騫
攝影:陳俊強
髮型:Terry Yeung of CORNER
場地提供:The Emperor Hotel

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載