› 選擇地區
三藩市
紐約
洛杉磯
其他美國地區
香港 台灣 北美
 
2018年06月04日

無綫綠葉癱瘓入院
吳博君患漸凍人症
地獄人間三個月

【《蘋果》專訪】
曾拍攝多部無綫劇的「綠葉」吳博君,數月前癱瘓入院,證實患上罕見的運動神經元病,俗稱「漸凍人症」。失去工作能力的他,太太辭職專心照顧,經濟陷困境,幸得劉德華、薛凱琪及訓練班同學等解危,現博君可再站起走路,經歷地獄人間三個月:「我由一個好絕望,變番充滿希望嘅人!」

相關新聞:吳博君病後手停口停含淚多謝劉華捐錢解困境

於70年代加入無綫的「綠葉」吳博君,擅演鹹濕佬、店小二,甚至壞人角色。97年金融風暴被無綫裁走,當年他40歲,轉行做過麵包師傅、紙紮舖及寫字樓清潔。今年61歲的博君在荔景邨跟太太互相扶持,怎知今年3月16日,博君忽然四肢無力癱瘓入院,證實患上運動神經元病(MND)。由於醫生指沒藥根治,還以為要在床上過完下半生,幸現在病情奇蹟地出現轉機,他可以再站起來,博君再次展露笑顏,日前在家中接受《蘋果》專訪細訴由地獄折返人間的心路歷程。
博君說:「開頭有少少手震,以為柏金遜,後來手同腳越嚟越冇力,瞓喺張床起唔到身,成個好似癱咗咁,叫白車入醫院。」當證實患了MND後,醫生跟他說:「你第日會冇力,目前嚟講全世界冇藥醫。」博君嘆謂:「完全癱喺張床唔郁得,頭腦仲好清醒,咁先至痛苦!我成個人沉咗落去,跌咗落去絕望裏面,直情等死咁。我曾經諗過,不如死咗去好過,手腳肌肉係咁流失,瘦到好似皮包骨。」

曾想了結生命

博君被醫生叫他出院住安老院,博君說:「安老院住咗差唔多成個月,朝朝聽隔籬床嘅老人家嗌交,負能量好大。喺安老院期間,艾威太太介紹我食中藥,好奇怪,兩劑左右,發覺有啲轉機,可以落到地行,𠵱家叫做行到吓,今日都有返醫院做物理治療。」博君重展歡顏說:「𠵱家有少少力,勉強可以揸筷子食飯,大小便、沖涼都得,呢個病最大體會係無常,今日唔知聽日點。」博君寄語同路人:「早啲去醫,唔好咁易放棄,各方面都試吓,同時間競賽,同佢拼過,我𠵱家每日做健身,強化番自己身體。」

採訪:余燕儀
攝影:林德雄、沈健程

相關新聞:心痛太太撲來撲去

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載