蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年06月07日
馬上成為壹會員

【馮仁昭四圍超】丁子高入院割盲腸
千嬅爆阿仔嚇親

楊千嬅噚晚着露背裝示人,透露老公丁子高已做盲腸炎手術。

楊千嬅、劉嘉玲、陳奕迅同徐濠縈等噚晚去咗中環ifc戲院,出席《侏羅紀世界:迷失國度》(Jurassic World:Fallen Kingdom)首映。

前晚開完刀

對於丁子高日前患上急性盲腸炎,要立即入院做手術,千嬅話:「佢噚晚開完刀,𠵱家休息緊,如果傷口冇血水出,今晚就可以出院。醫生話盲腸炎冇原因,可能抵抗力唔好,細菌入腸。」千嬅話阿仔都嚇親,仲笑言六年前嘅前日阿仔出世,𠵱家老公喺同一間醫院攞條盲腸出嚟。

嘉玲讚偉仔

嘉玲啱啱去完旅行返港,要投入《奪命証人》舞台劇演出,透露會去法庭觀摩,仲笑言有人提醒佢唔好喺法庭入面影相。講到老公梁朝偉喺帆船賽攞第二,嘉玲好戥對方高興:「佢好有天份,有運動細胞,由細到大好鍾意海同水,平衡力又好。」
提到近日林燕妮離世同時裝設計師Kate Spade吊頸自殺,嘉玲對林燕妮嘅死訊話:「聽到呢個消息都唔會太愕然,呢個係人生必經,自己都有咁上下年紀,都聽得多,要學習去面對。」
至於Kate Spade患抑鬱症自殺,嘉玲話:「呢啲病真係好可憐,可能太辛苦,所以選擇呢條路解決,都要多啲留意同關心呢啲病,社會越嚟越多人有抑鬱症,可能因為壓力大,有可能係貧富懸殊,空氣都可能係一個問題,好多人釋放唔到呢啲問題,其實唔需要藥,大自然都可以治癒。」
撰文:馮仁昭

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載