蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年06月09日

【炒熱世界盃】仲玩BBQ?
ViuTV新節目搶收視

4,352
小肥同許廷鏗除咗大玩二創,惡搞經典金曲串爆球賽,仲會現身同大家一齊睇波添!

【特約報道】
之前林敏聰同梁漢文就幫ViuTV主持Good Night Show《全民星戰》硬撼大台搶收視,距離世界盃仲有唔夠一星期就開鑼,除咗直播其中19場賽事,原來ViuTV仲有4個同世界盃有關的旅遊及綜藝節目排緊隊上場,仲有男神王宗堯、名宿丘健威、俄仔Ansheles等加持,相信今年球迷可以擺脫荷蘭叻,非球迷亦唔使再硬食「BBQ大團圓」,換個方式投入賽事。

嚟緊嘅《全民睇波派對》就由王宗堯、林耀聲、丘建威、強尼等人組成「星級睇波團」,為撐心水愛隊未開波已經有一輪「牙較戰」兼埋身肉博玩遊戲,務求KO對手。陳詠謙、小肥同許廷鏗都會放低歌手包袱惡搞二創經典金曲,無面俾寸盡各場球賽賽果。家庭觀眾可能一邊睇一邊參加「波神擂台」,隨時贏走智能電話同靚車。除咗電視節目,成班嘉賓仲會離開電視框走入商場同現場觀眾玩遊戲,開波前同大家做足熱身玩餐飽,想親身投入盛事就記得mark實活動時間。

《返歸啦俄仔》
6月25日起 逢星期一至五晚上10時30分 ViuTV 99台
今屆世界盃於俄羅斯舉行,ViuTV就搵到正宗俄仔Ansheles做導遊,帶住3位少女走勻莫斯科、喀山同索契食買玩,仲會返家鄉見「未來奶奶」!睇預告見Ansheles一落機就同媽咪來個愛的抱抱,又有唔少「香艷」出浴騷肌鏡頭,煞食外型加埋暖男性格,係唔係球迷都肯定睇到興奮大叫。

《橫衝直播俄羅斯》
6月1日至14日 每日下午5時至凌晨1時ViuTV Facebook Page
娛樂圈靚仔固然有着數,唔賣樣走搞笑路線都有市場。三個九十後「肥仔釘」吳國麟、「提子駿」黎梓駿同「爆呔占」梁天俊組成的「衝三小」近期於網絡爆紅,網民大讚三人爛gag多過浪花但又效果超爆笑,今次仲膽粗粗踩入俄羅斯,於揭幕戰前每日於ViuTV Facebook開Live,事前講明無行程瘋狂亂入玩轉景點,仲要無底線真正順從(網)民意任你玩!

《世界盃稀客》
6月9日星期六晚上10時45分
廣告都話電視節目有好多種,要juicy有juicy,要認真一樣可以。今屆世界盃有唔少「生面口」隊伍晉級,唔做功課真係會黑人問號!陳安立(Brain)同潘杰寧(Kelena)唔玩熱門國家,偏偏帶大家貼冷門走入冰島、巴拿馬同秘魯作深度遊,了解當地足球文化,分析三隊究竟係被走漏眼定係魚腩。Brian仲會去火山旁的溫泉區於熒幕上首次「獻身」,嘗試山澗中野外浸溫泉的滋味,仲會挑戰史上最暗黑料理,硬哽比臭魚罐頭更難頂嘅發酵鯊魚肉同烤羊頭,真係隔住個mon都聞到,咩地獄廚神都要行埋一邊!

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載