› 選擇地區
三藩市
紐約
洛杉磯
其他美國地區
香港 台灣 北美
 
2018年06月16日

陳展鵬租務糾紛
業主再拿出證據反駁

陳展鵬最近被業主控訴,話佢之前租住將軍澳維景灣畔一個800多呎3房高層單位,提前退租不特止仲欠租,而且屋內有損壞,包括地板、冷氣機等等。陳展鵬同日出席活動時,帶齊WhatsApp截圖做證據,反駁業主嘅指控。

過咗一日,事件仲未平息,之後業主同樣攞齊證據,向周刊再爆料,指摘陳展鵬包括租約、熱水爐及無理由下失去聯絡。前晚連大台《東張西望》都有講解按金係唔可以代替租金一事,講番句公道話。

業主同樣攞住白紙黑字嘅證據,再次控訴陳展鵬三宗罪,包括租約、熱水爐及無理由下失去聯絡。

【租約問題】

之前陳展鵬就咁樣同傳媒講︰「一年內有問題,就可以一個月前通知業主,但要畀一個月就可以冇事,並唔係冇交成年租。」而業主就攞出租約,租約裡面第一項就寫明︰「由2017年5月1日起至2019年4月30日止。規定租客在租用期內不得退租,否則按照所餘租期之時間賠償租金。如租客在租用期一年內退租,業主有權扣除一個月按金之數目以彌補損失。」

租約入面關於「退租」嘅條款,仲有一項:「租約期滿,住客如繼續租賃或退租,須於一個月之前以書面通知。」業主反駁陳展鵬話一年內有問題,一個月通知業主就可以搬走嘅講法,業主仲話︰「租約係陳生提供,內容係睇清楚先至簽。」

根據《2004年業主與租客 (綜合)(修訂)條例》,2004年7月9日當日或之後簽立的住宅租賃,這類租賃將按照租約條款,或業主與租客同意的其他方式予以終止。如租賃並無規定或雙方亦無協定其他方式終止租賃,依據普通法原則,固定期租賃 (fixed term tenancies)將在租期屆滿時終止,惟就固定期租賃 (fixed term tenancies)而言,不得早於租賃期屆滿日。

【熱水爐爭拗】

至於陳展鵬話佢屋企最緊要係嗰煤氣爐,嗰日佢就咁講︰「煤氣爐好重要,因為我媽咪洗碗嘅時候,天氣凍,年紀大,隻手唔可以凍,要熱水。係入伙前,四月份已同佢講,煤氣爐要換過嗰新,唔係拖一兩日…係幾個月,真係已經頂唔順,冬天真係太凍,我搵煤氣公司上去,你唔搞我就自己搞,我留張單俾你,搞下搞下搞到上年年尾先至換。」

不過業主就反駁稱,一月份收到陳展鵬通知,話工人房熱水爐壞咗。但因為煤氣單係陳展鵬個名,故業主叫陳搵煤氣公司上嚟更換,費用由業主俾。點知過咗段時間,陳展鵬同業主講煤氣公司換唔到,叫業主諗辦法。最後業主幫佢換咗一部,費用由業主支付。業主又稱:「我有單有據,陳生幾時有俾過錢呢?」

業主仲攞出WhatsApp截圖指,陳展鵬喺2018年1月2日向業主表示︰「熱水爐用不到,請安排維修師傅。」而業主提供單據證明喺2018年2月28日,用$3,899蚊喺該單位買咗部12L嘅熱水爐,仲係2018年3月2日完成安裝。

【失聯絡】

業主仲話陳展鵬係個對數口精嘅人,初初租住時,有多嘢要換,都係由業主俾錢。業主話︰「好似窗簾路軌,$88蚊佢都叫我俾,我都俾番佢。證明陳生數目好清晰嘅。」業主仲重伸陳展鵬斷晒聯絡,無法協商,所以先至搵傳媒協助,迫陳展鵬現身。

【同場加映】

至於前晚大台節目《東張西望》都有講陳展鵬單新聞,喺尾段主持人陳庭欣就話︰「究竟按金係咪可以代替租金呢?」之後陳庭欣根據租約條例解釋話︰「一般租約列明按金係唔可以代替租金,按金係業主收番單位時,去到單位檢查過冇問題先至退番按金。咁當然如果業主同租客,雙方達成共識,係可以嘅。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載