蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年07月13日

窮到燶 冇鬥心 自判紅牌出局
吳國敬臘腸人生

149,608

【《蘋果》專訪】
53歲吳國敬在娛樂圈打滾33年,面對人生高低起跌,他早年受喪母打擊失去鬥心,給自己「紅牌」退居幕後,但每個經歷都為阿敬帶來正能量,教曉他要活在當下。即使阿敬當年窮到燶,冇錢開飯,要在家中煮即食麵醫肚,連雞蛋腸仔都欠奉,阿敬只有用臘腸做餸。回顧「臘腸人生」,阿敬從沒有自怨自艾,積極向前。

相關新聞:【女友唔嫁】幸福三口未獲婚期

吳國敬是波牛愛足球,今日會偕圈外女友Elaine,隨明星足球隊出發俄羅斯睇後日的世界盃決賽,回來後便投入準備本月28日在旺角麥花臣場館舉行一場的「敬搖滾樂團演唱2018」。阿敬85年參加無綫和華星唱片合辦的《新秀歌唱大賽》入行,雖然落敗,但仍遇到伯樂加入樂壇,87年憑一曲《玩火》彈出,阿敬在搖滾樂上盡見才華,他享受做Rock騷。

看透跟紅頂白

訪問當日,阿敬換上全套球衣,在球場上馳騁,若要用球場術語套用在他的53年人生,他不無感慨:「我早年出咗《我說過要你快樂》同《玩火》後,因為媽媽突然發生車禍喪生,我太傷心,都冇晒鬥心,冇信心做幕前歌手,但又唔捨得離開音樂,我匿埋寫歌,嘗試做創作人,用足球術語,我係自己畀自己紅牌。」
面對過高低起跌,阿敬完全看透樂壇跟紅頂白,也當然站過出局邊緣,幸好阿敬樂觀:「冇理咁多嘢,冇創作,一定係我狀態低落,腦便秘,所以自然要去吸收多啲嘢,真空期後,又有新嘢出,起落係正常。呢個階段係我反彈期,我一直收埋咗二、三十首新歌,呢一水想留自己用咗先。」阿敬已揀選了新歌,準備在Rock騷發表。
阿敬感慨現今香港樂壇一池死水,作歌收入更大不如前,「以前作一首歌有六位數字收入,𠵱家唔賣碟,冇版稅,話唔定作一首歌得幾千蚊,咁不如自己用。網上點播又未夠成熟,做創作搵食極之艱難,我係非常少產,我唔識樂器同樂理,創作係靠靈光一閃,多謝個天畀我靈感同旋律,好多時唔係話今晚可以寫兩首歌,可能二十,甚至二百個晚上先寫到一粒音。」收入大縮水日子,阿敬曾萌返美國打理家人餐館生意,但最後懸崖勒馬。

相關新聞:【半百歌聲】黃翊返嚟揸咪

太計算會失敗

阿敬說:「點苦都捱過,務求音樂可以成為我嘅終身職業,作歌作到老,唱到老,做得開心咪得,唔使介意台下有一萬定十位觀眾,我唔會計咗結果先去做,咁你好失敗,唔使球證,觀眾都要你出局。」
入行33年,阿敬嘗盡甜酸苦辣,樣樣都難忘,記得阿敬曾提及窮到燶時,用雪櫃剩下臘腸煮公仔麵充飢:「點會仲諗以前食臘腸公仔麵啲唔開心,點窮都唔會再食,到時寧願食齋麵。」
阿敬現在有事業,有恩愛女友Elaine,夫復何求。
採訪:陳杰
化妝、髮型:Chris Lam

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載