› 選擇地區
三藩市
紐約
洛杉磯
其他美國地區
香港 台灣 北美
 
2018年07月18日

【巾幗英紅8】三封金像影后
惠英紅從影41年總結:貪心,就遺憾

鏡頭前,惠英紅是烈女,鏡頭後,她是柔情女子。

為了證明這一點,88年,27歲的紅姐大膽為《PLAYBOY》拍攝全祼寫真,有指是她自掏10萬元赴法國巴黎拍下這輯露點寫真,以八十年代尺度來說,十分大膽。據知當年寫真每本賣100元,並賣出15萬本。

「影呢輯相,因為有不忿,從來唔覺自己醜樣,但搵親我嘅角色唔係靚,識我嘅人知我係一個好細心嘅人,我唔粗魯,最憎打打殺殺,偏偏我用呢樣嘢搵食(指拍動作片)。咁啱機緣巧合,《PLAYBOY》創刊,我識佢哋總編,當年好興寫真,『寫真』係日文,即美麗的照片,冇要加黃色嘅嘢,如你用健康角度,佢係一本好靚相冊,鄭文雅同黃小鳳都影過,我唔覺好色情。」

紅姐希望借寫真令大家對她改觀:「好想話畀大家知,我係女人嚟㗎,以往出埠,永遠我篋大大個,冇人同我拎落嚟,有啲女仔拎住細篋仔,都成班人湧埋去幫手。我真係比你靚,又細粒過你,點解冇人理我㗎,大家叫我兄弟,我好似唔介意,但其實我係介意嘅,從來唯有瀟灑啲。」

紅姐當年拍全裸寫真前,要闖過甚麼心理關口或準備功夫?她答:「當年日日拍打戲,我又拍《霸王花》,我從來對身形好自信,我老鼠仔起晒『月展』。」58歲的「美魔女」,分享逆齡貼士:「冇醜嘅女人,只有懶嘅女人,呢十幾年我先知,要調節內心感覺,氣場同感覺令樣變,嗰份係自信,千祈唔好介意自己有幾條皺紋,應該慶幸自己有皺紋,有啲人想老都冇機會,有時候老係一種福氣。」紅姐相信心善則美:「我當然也會遇到挫折,我都會有病痛,要催眠自己開朗番,要令自己冇負能量。我情緒有時都會失控,個樣會睇到唔靚,靚唔靚真係內心出嚟。」

紅姐食療很簡單:「我冇食人參,反而食桃膠、雪蓮子、雪耳、黃耳補吓膠質,偶然飲下花生雞腳湯,膠質對皮膚同關節好緊要,我食嘅都係平價補品。」紅姐也會看中醫調理身體:「我有濕疹,主要去肝火去濕。」沒工開的時間,紅姐享受慢活,學畫畫及親自下廚給家人。

正能量也為紅姐添美態,人緣好的她,身邊不乏貴人,紅姐先數閨密是鍾慧冰:「我相信人與人之間有上一世,有次我催眠,我係佢阿婆。」倒帶40歲紅姐患抑鬱症時,「我最差時,半夜只搵佢呻,做儍事嗰剎那,我都打畀佢。我掛起電話,佢覺得我有事。病發嗰一年半,我隔日打畀佢,怨到樹葉跌落嚟。但嗰一日,佢覺得唔同,覺得我係有事,係有分別,半夜三、四點傾完電話,佢眼瞓叫我收線,平時佢唔放心打番轉頭,佢打唔通就覺得我係有問題。佢如果冇通知我屋企人,我就唔會再有機會行番出嚟,阿冰係我貴人、閨密,又係我恩人,有幾次上上落落都幫我一把,成日又被我搵笨、畀我鬧。」紅姐86年接拍電影《神勇雙響炮續集》時,鍾慧冰當年在嘉禾做製片,同片還有林建明,三女結緣,不時相約打麻雀。

事業還未上高峰的紅姐,似乎為工作忽略了愛情,至今仍單身,感情缺失可是人生遺憾?紅姐卻另有見解:「人生太多遺憾,當你唔諗,人生就冇遺憾,唔好再去太貪心,再硬要去講冇結婚係遺憾,咁你一定遺憾,好心唔好去諗咁多,做人唔好太貪心,你一貪心就好多遺憾,諗到好多遺憾就搞到自己真係好多遺憾,咁就好唔開心,何必呢,人生短短幾十年。」

紅姐行事值得後輩學習,她笑言要教大家「淡定有錢剩」:「唔好放棄,我真係唔係大成就,我只不過唔係一個失敗者,我哋遇到任何困難,千祈唔好放棄,人生會遇到好多事情,過後回望會變得好少,只係眼前事情,只要淡定啲就可以解決到,唔好慌張。」紅姐今年7.1被公佈獲頒銅紫荊勳章,她感恩:「接到呢個消息時,喺北京開工,好開心,感激唔同界界別人士認同我喺電影圈小成就,係好大鼓舞。」

撰文:比華利
攝影:林德雄
攝錄:葉君海
髮型:James Lee@HAiR
化妝:littlewhite
場地:金公館

相關新聞:【巾幗英紅5】童年獲母警局搶槍相救惠英紅牢記父訓「你放膽做」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載