› 選擇地區
三藩市
紐約
洛杉磯
其他美國地區
香港 台灣 北美
 
2018年07月20日

【姐匙Talk】BB公主病發扮大師

喺娛樂圈入面,好多外表斯斯文文嘅女神,其實私底下就勁港女、超級難服侍,仲意見多多,邊個都唔畀面。不過,佢哋「啷厲」嗰一面,梗係唔會咁易俾人睇到啦。好似女神「BB」咁,平時喺公仔箱見到佢,講嘢嗲聲嗲氣、又識放電,真係迷倒唔少宅男,連好多男對手都被佢電到暈晒大浪。不過之前佢幫某傳媒影相,港女性格就表露無遺啦。

唔合作唧都唔笑

話說,BB同雜誌影相嗰日,人哋特登借咗間健身室,仲安排咗個教練畀佢,事前講好晒會影佢做運動嘅相。點知BB到場嗰陣已經嘴藐藐,勁擺巨星款咁,個健身教練好意咁教佢做動作,佢又呢樣唔願、嗰樣唔制,總之就係唔多合作。到正式拍攝,BB就更加嚟料,當攝影師想舉機時,佢仲大大聲喝住人︰「唔好影住。」之後又反客為主,大師上身咁教個攝影師影相。人哋梗係唔聽佢支笛啦,BB勁冇癮,咪全程黑晒面,唧都唔笑囉。
事後健身室嗰邊想用番輯相同短片,不過BB就發晒老脾,透過經理人同場地負責人交涉,話一定唔可以畀輯相間健身公司用。大姐呀!人哋出埋場地同教練,梗係想出番啲相啦。後來因為BB態度強硬,又講到話若果健身室出啲相,就即刻要出律師信告人,咁大家怕咗佢,咪息事寧人唔出囉。
撰文:Jessie
本欄逢周五刊登

【姐匙Talk】
我姐匙縱橫歌影視幕後,咁多年嚟冷眼旁觀,娛樂圈大小事都走唔過我雙眼,真係頂唔順要爆啦!歡迎大家嚟剝花生。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載