› 選擇地區
三藩市
紐約
洛杉磯
其他美國地區
香港 台灣 北美
 
2018年08月10日

【姐匙Talk】少爺仔爛蒲保鑣傍實

成功靠父幹,好多城中富二代、富三代讀完大學就返屋企幫手,當然係空降做高層,仲安排公司老臣子睇住。好似「少爺仔」咁,畢業後返去幫老竇手,一入職就做高層,加上佢係屋企長子,所以外界都認定佢係接班人。
30出頭嘅少爺仔,工作表現就唔多清楚,不過佢最大嗜好就係去夜蒲湊熱鬧,試過好幾次去派對玩得興起,同人嘈交,去到夜場成個小霸王咁,冇人夠膽得罪佢。少爺仔愛夜蒲,玩得夜就第二日唔返工,就算阿爸都冇佢符。

飲大幾杯起爭執

少爺仔最鍾意去中環夜場,又愛媾外籍model,有時俾人影到一拖幾,到周末就同佢哋去開船P,總之就享受玩樂。前幾年見佢有個拍得穩定嘅外籍model女友,雖然父母唔係想新抱係外國人,不過見佢修心養性過一陣,都慢慢接受,點知到最後都係分手收場,少爺仔又過番佢嘅夜蒲生活。
少爺仔喺中環夜店嘅江湖地位,蒲開都大概知道。不過最近有一次佢哋飲大幾杯起爭執,混亂中仲有人受傷,搞到少爺仔成家都好擔心,勸佢戒蒲,又安排保鑣跟住出入,等家人可以安心,少爺仔𠵱家出入都有人保護,連去clubbing都係。
撰文:Jessie
本欄逢周五刊登

姐匙Talk

我姐匙縱橫歌影視幕後,咁多年嚟冷眼旁觀,娛樂圈大小事都走唔過我雙眼,真係頂唔順要爆啦!歡迎大家嚟剝花生。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載