› 選擇地區
三藩市
紐約
洛杉磯
其他美國地區
香港 台灣 北美
 
2018年08月17日

【馮仁昭四圍超】離港探仔過68歲生日
阿倫帶曉風拜候阿Sam

阿倫喺下星期四生日,前晚唔少歌迷向佢祝賀。

譚詠麟(阿倫)同許冠傑(阿Sam)合體嘅一連11場演唱會,前晚喺紅館順利完成,王家衛夫婦、梁漢文、蔡一傑同郭藹明等捧場。下個星期四係阿倫68歲生日,唔少觀眾派利是畀佢預祝。完場後佢哋喺後台搞祝捷會,阿倫話唔捨得:「遲啲我哋有巡迴,因為有啲job定咗喺年尾,所以要夾一夾時間。」阿Sam話自己做巡迴冇問題,已經習慣。

幫手湊孫

阿倫提到今次演唱會後,同阿Sam關係變成一家人,更試過幫對方湊孫,又讚阿Sam孫仔好可愛墜手,阿倫仲讚阿Sam老婆好客氣:「唔知係咪驚我瘦得滯,送咗一大籃朱古力畀我,嗰度有成幾百粒,我同啲工作人員一齊食。」問到有冇見過阿倫個仔曉風?阿Sam搞笑話:「只係睇過啲相,未見過廬山真面目。」阿倫即話:「佢喺外地做嘢,一返嚟就叫佢即刻拜候你。」
問到阿倫點慶祝生日,佢話唔喺香港過,問到係咪去搵曉風慶祝?阿倫笑住話:「多謝關心,下個禮拜放假㗎喇,去亂食嘢。」阿倫講過唔會喺偶像面前講大話,不過阿Sam未追問,阿倫已同佢講:「我連你都會呃住先!」
撰文:馮仁昭

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載