› 選擇地區
三藩市
紐約
洛杉磯
其他美國地區
香港 台灣 北美
 
2018年08月19日

【娛樂人物】情歌王子下月60歲冥壽
長兄陳百靈 當我想起陳百強

「當我想想起你,仍像昨天一般深愛你!」情歌王子陳百強(Danny)在二十五年前不幸離世,令不少歌迷大感惋惜。下月7日是他60歲冥壽,胞兄陳百靈早前接受訪問分享Danny生前軼事,Danny身邊一直不乏紅顏知己,但都只是把他當作弟弟。反而曾為Danny填詞的唐書琛大爆當年他拿着心儀女孩的照片,嚷着要寫歌獻給女神,經典歌《愛沒有不對》亦就此誕生。

撰文:祖李

相關新聞:鍾鎮濤視如至親嘆太早走

下月7日是陳百強的60歲冥壽,今年亦是他逝世25周年,他的歌聲、才華即使相隔近三十載,依然讓歌迷難以忘懷。Danny的大哥陳百靈及好友唐書琛等早前作客港台節目《舊日的足跡》緬懷Danny的生前點滴。
「就算愛沒有不對,怎麼不可相對……」在Danny的《愛沒有不對》歌詞中,有一種欲愛不能愛但仍要愛的無奈,原來也是Danny的情路寫照。Danny的情歌大多哀怨纏綿,但陳百靈從未聽過弟弟拍拖︰「Danny有好多紅顏知己,好以鍾楚紅、張曼玉同梅艷芳,不過個個都當佢係細佬,至於佢同翁靜晶嘅傳聞,我都係喺報章睇到,但從來冇見過,佢亦冇講感情事。」

憑歌寄意送贈女神

《愛沒有不對》的填詞人盧冠廷太太唐書琛卻說出另一個故事,原來這首歌是Danny憑歌寄意,獻給心中的女神:「我哋約喺唱片公司見面,我坐喺梳化上等佢,陳百強攞住一張女仔相『飛』入嚟,坐喺我身邊,成個人黐住我,畀張相我睇,相入面個女仔好可愛,係圈外人。佢問我意見,問我靚唔靚,仲好坦白佢內心感情。Danny寫咗首melody畀我,要我為佢寫出心裏面嗰份愛,獻畀女神,當然我都有加鹽加醋。」
Danny早在79年入行,同年推出大碟《眼淚為你流》,陳百靈對此甚為難忘,皆因當時Danny與羅文到英國表演,但卻整天神經兮兮,不停打電話回港問銷售情況。Danny緊張工作之餘,亦甚為緊張親人,陳百靈當年每天拿着紙袋上班,Danny見狀就為大哥送上一個名牌手袋:「Danny睇唔過眼,就將佢嗰個,只係用咗個幾月嘅LV名牌手袋送畀我。我用咗十幾年,換過幾次拉鏈同手把,用到變咗『鹹菜』,𠵱家就珍而重之咁收藏。」除了手袋,Danny也為大哥送上衣服,不過陳百靈卻笑說無福消受:「佢每件衫都大兩個碼,佢有送衫畀我,但我唔敢着,無福消受。」

相關新聞:【群星翻唱】開騷出碟紀念

澄清同張國榮關係

Danny與張國榮曾屬同一經理人,又合作電影《喝采》及《失業生》,但兩人多次傳出不和。陳百靈為Danny澄清:「其實Danny同張國榮係好朋友,我見過佢哋喺麗晶一起飲下午茶,佢哋之間冇乜猜忌,不和係外間傳聞箒。阿強昏迷嗰陣,張國榮都會嚟探病。」
陳百靈指Danny生前其實有個心結,就是希望得到父親的認同︰「佢覺得爸爸唔欣賞自己,後來佢為咗討爸爸歡心,就學唱一首粵曲。如果Danny依然仲在世,60歲嘅佢一定仲好有型,可能仲喺樂壇好活躍,同譚詠麟一樣繼續扶持後輩,我以呢位弟弟為榮。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載