› 選擇地區
三藩市
紐約
洛杉磯
其他美國地區
香港 台灣 北美
 
2018年08月29日

【馮仁昭四圍超】
陳凱琳欣賞靚仔有禮
權相佑減肥谷肌

陳凱琳喺活動上見到權相佑,大讚對方keep得好好。

韓國男星權相佑噚晚同陳凱琳喺中環出席珠寶品牌HYÈRES LOR開幕,已有兩年冇嚟香港嘅權相佑,吸引半百fans到場支持。問到對珠寶有乜要求?權相佑話:「簡單為主,男人多數都係戴手錶、手鏈同頸鏈,價錢唔係最重要,最緊要係手感,我未收過女仔送嘅鑽飾,反而就有送畀老婆。」
提到電影《偵探:Returns》喺韓國票房好好,權相佑話:「返韓國會約電影中嘅朋友,大家傾吓出DVD同開慶功宴。」佢仲透露:「𠵱家拍緊另一部動作電影,入面都有好多動作場面同埋要騷肌,所以好用心減肥同做運動。」

喬妹甜笑派心

啱啱做咗人妻嘅陳凱琳,喺現場同權相佑合照,就讚對方keep得好好,但係講到咪心目中嘅男神,佢就話:「心目中另有其人,呢個人梗係我老公,不過權相佑keep得好好,欣賞佢係靚仔,而且又有禮貌,佢知我係13年港姐。」對於今屆港姐三甲人選,當晚評判之一嘅陳凱琳話係心水選擇。講到出爐港姐冠軍陳曉華都係粗口港姐,陳凱琳話:「人人有情緒,亦都有唔同發洩方法,最緊要係當晚表現。」
至於今晚出席另一活動嘅宋慧喬,噚日下午到港,喺機場行去上車嗰陣,喬妹邊行邊揮手同派心,又不時甜笑兼晒左手婚戒,吸引近10名粉絲接機。
撰文:馮仁昭

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載