› 選擇地區
三藩市
紐約
洛杉磯
其他美國地區
香港 台灣 北美
 
2018年09月01日

拍片提防騙徒黃牛
華仔籲市民勿買來歷不明門券

自從劉德華宣佈在今年年底於紅館舉行跨年演唱會後,不少樂迷引頸期待,大家都希望可以成功買到門票。華仔的演唱會本來將於下周二公開發售,不過已經有市民提早排隊等開售,結果在上月25日於柴灣售票處發生斬人事件,最後主辦商決定取消於售票處出售門券,華仔前晚出席活動時,承認不設售票處賣飛都會有問題產生,現階段只有見步行步,非常時期用非常方法,希望主辦商和其他歌手一齊想辦法。

收錢後失聯絡

在一票難求的情況下,相信黃牛黨的炒賣情況更加猖獗,華仔為政府拍攝了一條宣傳短片,呼籲市民避免受騙,要透過正確渠道購買演唱會門券。昨日警方透過官方社交平台,上載一條長1分40秒的短片,身穿白恤衫的華仔說:「我知道好多人喜歡睇演唱會,點解?因為可以近距離接觸,同支持自己喜歡嘅偶像,但如果你哋喺網上,或一啲非官方渠道買飛,我真係希望你哋小心啲,好多騙徒利用你哋嘅心理,然後透過好多唔同social media話畀你哋聽有飛賣,第一樣嘢就叫你過咗數先,到攞咗錢會想盡辦法,用好多藉口拖延交收,最後唔見咗。」

有懷疑停交收

華仔再三叮囑地說:「唔好信網上like、留言,一切一切我都覺得係博取你哋嘅信任,我又呼籲大家千祈唔好買來歷不明嘅門券,因為真係有機會墮入陷阱,亦唔鼓勵買賣黃牛飛。如果唔想做受害者我有個建議,就係一定要去官方同正確渠道買門券,如果買唔到,要喺第二啲地方買,買飛過程有任何懷疑,希望即刻停止所有交收同報警。」最後華仔呼籲大家,支持偶像的同時,還要保護自己,避免受騙。
撰文:唐琛悠

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載