› 選擇地區
三藩市
紐約
洛杉磯
其他美國地區
香港 台灣 北美
 
2018年09月07日

【姐匙Talk】榮榮愛滑嘟嘟手毛多

公仔箱以往盡收天下兵器,有一段時間差唔多最紅嘅明星都係幫佢打工,近排姐匙煲番一套叫《烏糟衫》嘅陳年劇。呢套劇就勁囉,集齊現今紅遍影壇嘅「榮榮」同「原居民」,又有成日扮警察扮到上晒身嘅「春田花花」,仲有食咗防腐劑嘅「滑嘟嘟」做女主角,今時今日,真係多多錢都請唔到佢哋合作,搞到姐匙都諗番起兩件有關榮榮同原居民拍劇嘅趣事。

原居民三號波漂出海

榮榮當年仲係新人,不過佢一攰又或者唔開心,就會拖住當時已經係公仔箱阿姐滑嘟嘟嘅手仔。大家唔好誤會,以為榮榮有心抽水,佢曾經同工作人員解釋過,原來佢鍾意女仔有啲手毛,咁啱滑嘟嘟就係呢個type,所以當年年紀仲係好細嘅榮榮,先向呢位大姐姐撒嬌啫!
另外,當年原居民要拍一場搭艇戲,咁啱開工就掛緊三號風球,只不過當年通訊唔係咁發達,所以冇人知,只係覺得現場好大風。而呢個鏡頭好快拍完,劇組嗱嗱聲準備下一場,當佢哋忙緊嘅時候,見到已隨艇漂遠嘅原居民猛咁揮手呼叫,不過原居民一向貪玩,所以大家都冇理佢。點知要拍下一場戲嗰陣,原居民仍然未返上岸,大家至知出事,好彩轉頭就見到原居民搭警車返嚟。原來當日太大浪,原居民隻船埋唔到岸,當年又冇得用手機求救,後來有捕魚船經過救咗原居民,佢先至上到岸兼坐警車會合劇組。
撰文:Jessie
本欄逢周五刊登

姐匙Talk

我姐匙縱橫歌影視幕後,咁多年嚟冷眼旁觀,娛樂圈大小事都走唔過我雙眼,真係頂唔順要爆啦!歡迎大家嚟剝花生。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載