› 選擇地區
三藩市
紐約
洛杉磯
其他美國地區
香港 台灣 北美
 
2018年09月10日

【娛樂人物】被老婆反出軌收伏
Eric Kwok唔敢越線

郭偉亮(Eric Kwok)在《Good Night Show全民造星》當眾問參賽者是否同性戀者,被歌手藍奕邦斥責他行為邪惡,引起軒然大波。談性,Eric從不忌諱,他日前接受《蘋果》專訪時,亦大談出軌理論:「男人唔出軌一係佢性需要好低,一係就係佢道德觀念好重,而我……就係道行好高……哈!」他未與葉佩雯(Grace)結婚時曾經出軌,後來對方反出軌回敬,雖然事過境遷,但自此Eric意識到要刻意與女性保持距離,似乎Grace才是道行較高的一個。
撰文︰祖李

攝影︰林德雄

相關新聞:與媽咪鬧大交護愛妻

郭偉亮近來為ViuTV節目《全民造星》擔任導師,早前他在節目當眾問參賽者是否同性戀者,被藍奕邦及不少網民認為他是歧視同志,Eric終在社交網致歉。事件發生前, Eric接受《蘋果》專訪,他對自己在節目說話不留情面,有此解釋︰「我係咁,呢個騷所有嘢都係真實!我係嚴,因為我見到佢哋好嫩,好自以為是,嚴可以令佢哋聽話。」Eric認為男人要堅強:「好竧!尤其男仔唔應該多喊,你見到佢第一次喊,你會心軟。但次次都喊,開心又喊、唔開心又喊,你就會覺得佢需要俾人鞭策多啲。」

道行高靠睇AV

男人要人鞭策,稱這些「鞭策者」為「人生導師」應該較為合適。Eric訪問中開口埋口都提到老婆,葉佩雯就像一塊植入了他腦內的晶片。Eric去年拍音樂劇《短暫的婚姻》,有場戲講述他曾出軌爆喊。事實是他與葉佩雯未婚前,曾經歷感情危機,先是他出軌,後來Grace亦反出軌回敬,雖然事過境遷,但代價還是不小。他說︰「太太偏向欠缺安全感,呢方面我要畀好大信心佢,其實我已經成日喺屋企做嘢。我studio喺屋企,基本上我二十個鐘都喺度,我係一個好好嘅家庭成員,冇一個老公可以spend咁多時間陪老婆,陪佢傾偈。」為了令老婆安心,Eric亦刻意與女性保持距離,連社交網的交流也杜絕。
不過提及出軌,Eric仍然理直氣壯︰「我覺得男人唔出軌,一係佢性需要好低,一係就佢道德觀念好重,可以控制自己。男人嘅衝動,咁多十萬年進化,一定想同唔同嘅女人繁殖下一代。如果個老婆永遠都唔知,永遠都發現唔到,呢個世界冇人影到你,咁一百個男人都會做!」那麼生理定律與感情範疇如何平衡?他慧黠的眼神一轉,徐徐說︰「你實問我會唔會做,我會答你……唔會……我道行好高!哈。呢排啲AV好好睇!呢樣嘢解決到,我諗呢個世界冇AV,應該會好多人出軌!」

相關新聞:讚嘆秋官專業 埋位會漱口

男女關係格食格

Eric說男女關係是格食格,他表示與太太開始拍拖以來,都是由他主導︰「Grace話佢以前嘅男朋友,我諗有八、九個,佢都係話事嗰個。佢講到好誇張,佢使佢嗰啲男朋友、摑佢啲男朋友,總之佢係王后。我識佢嗰陣佢20歲,可能因為年紀,又可能係格食格,後嚟我哋同居一、兩年,佢就calm down。」語畢,Eric突然一臉認真︰「可能我識𠱁佢開心、引佢笑,男人有幽默感係好啲,要另一半估你唔到,你一定要同佢一樣咁聰明或者聰明過佢少少,先至可以令佢笑㗎嘛!」
戲外的Eric變得循規蹈矩,不過螢幕上他的角色大部份偏向狂野,床戲、咀戲連場不在話下,更做過變態殺手姦屍。「咁多年我都好favourite我太太,所以如果拍戲有得抽離現實,攞正牌去做嗰陣我會好享受。我講笑!哈!」不過字裏行間,聽得Grace對Eric其實很有辦法。Eric說:「初時接電影《老笠》,我飾演嘅江湖大佬同崔碧珈有好多親熱戲,我有同佢報定案。佢當時好大方話,你做啦!我會嚟片場睇你!接完呢齣後,齣齣都有啲關於性嘅嘢,接到第三、四齣,太太就覺得係時候要停,佢覺得自己開始頂唔順,所以之後我都少再接呢類角色。」
Eric與太太同是水瓶座,他說自己有時沒耐性,會對太太無故發脾氣。例如他自己不貪靚,但太太很緊張他的皮膚,會幫他定時敷面做清潔︰「佢有呢鋪癮,尤其最鍾意同幫我黐鼻頭啲污糟嘢。佢好享受,反而我會容易竧。」太太更做他的形象顧問,幫他襯衫,但每次叫他換衫試衫,穿不到幾套他又覺得煩︰「我明白佢係為我好,但有時我就忍唔住向佢發脾氣,唔明點解要我試上身,其實佢襯好就得。」

愛上做戲增情趣

Eric近年愛上拍戲,太太Grace名正言順成了他的導師︰「以前我睇佢啲戲,好似《創世紀》,只會笑佢,彈佢做得唔好,唔會由演員角度去體諒佢辛苦,但自從我鍾意咗做戲之後,我會問佢點演,又會同佢對戲。」角色轉換了,兩夫妻之間亦多了體諒及情趣。「以前監製佢啲歌嗰陣,我好嚴,但𠵱家輪到佢笑我,對我指指點點,世界輪流轉囉。我哋識咗十八年,好似搵到個新景象,大家有新話題,我從來未拍過樣嘢太太會日日追嚟睇,我哋𠵱家會晚晚一齊睇《全民造星》,多咗好多樂趣。」
成功男人背後都有賢內助,Eric一向口沒遮攔,他說 Grace曾多番告誡:「太太會提醒我,要小心講嘢,平時我講嘢唔會刻意避忌。」可惜Eric仍未做到這一方面。Eric訪問中三番四次多謝老婆,懂得感恩、珍惜,就是他對愛妻最大的回饋。
化妝︰Circle Chong @AnnieGChan
髮型︰Adrian Tong
場地提供︰FUMI

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載