蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年09月13日

【娛樂人物】因樂易玲棄用
林祖輝幕前退隱

20,850

林祖輝跟黃子華相交30年,命途相似經過高山低谷。祖輝由亞視小生,輾轉落腳無綫,卻被樂易玲拒簽藝人約,惟有退居幕後做經理人,從頭學起搞生意,代理名牌童裝。他自言只要不擺在心,轉行的心理關口,過一日就會釋懷。
採訪:嵐山
攝影:葉君海

林祖輝離開幕前多年,除做過DJ外,先後在亞視及有線任職,輾轉向無綫叩門卻被拒。祖輝日前接受本報專訪講起往事時,態度輕鬆:「08、09年我做過無綫藝員科經理人,好坦白當時係搵過樂小姐(樂易玲)畀我做幕前,但佢唔畀,叫我做藝員科,咁咪做藝員科囉。」至於心理關口,他自言只要你不擺在心,過一日就會釋懷。

受子華影響轉投亞視

跟黃子華在電台工作時認識,至今相交30年,祖輝大讚對方轉數快:「以前做電台,每日都要度好多gag,佢成日睇好多棟篤笑嘅書,唔單止係搞笑,而係言之有物,所以點解咁襟。」他回想年輕時做DJ最開心,88年跟黃子華、鄧梓峰、歐陽德勛、胡增良、彭鏡光及歐陽應霽等主持《咪前七先鋒》節目。祖輝擁6呎身高,之後被亞視招攬,他說:「其實又係子華、梓峰一班人過檔亞視做晨早節目,我之後入咗劇組,第一部就做第二男主角。」
近年「亞視幫」在無綫發圍,祖輝太太姚嘉妮早於01年已過檔,但多年來一直被投閒置散,更被派做《都市閒情》主持。雖然祖輝曾在無綫做過經理人,但未能幫到太太事業,他說:「新人好簡單,捉上去戲劇部直接介紹畀監製認識,但太太本身係藝人,透過真正合作同認識更重要。」

嘆老婆有潛質冇機會

二人結婚多年,育有9歲囡囡Kyra同6歲囝囝Kyros,祖輝大讚今年踏入40歲的太太身形保持得很好:「佢好鍾意食嘢,又易肥,但就好忍得,會做好多運動。冇話抵唔抵,好多時練十年就係等一個機會,我覺得佢係有潛質。咁多藝人,監製未必好多時間去了解一個藝人,但如果有越多機會,發現原來佢演癲癲喪喪都得,咁其他人或者都會睇到,有潛質嘅就自然有人度身訂做角色畀你,拍劇真係好睇天時地利人和。」
祖輝透露太太當年懷第二胎時,自己正身在北京做國家級運動員的經理人,經家庭會議商討,後決定返港發展,退居幕後代理多個名牌搞童裝生意,他自言要從頭學起,更講笑稱入貨要問囡囡意見。提到在子女心目中的評分,他笑說有一百分,但相比起太太的無限分,依然差天共地。
場地提供:ROOKIE(沙田分店)

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載