› 選擇地區
三藩市
紐約
洛杉磯
其他美國地區
香港 台灣 北美
 
2018年09月18日

【馮仁昭四圍超】阿澤對抗「不停工」
員工返工即炒

颱風「山竹」餘波未了,噚日雖然風勢減弱咗唔少,但好多路都受塌樹影響,好多網民都促請特首宣佈停工,但特首冇理咁多,要返工嘅繼續等車返工。
反而某啲「民企」就顯示出通情達理嘅一面,好似杜汶澤鬧特首離地兼冇同理心之餘,仲宣佈自己公司員工唔准返工,違者炒。佢仲喺網上話:「不但普羅市民受苦,連好多半山友都話,塞咗一個鐘都落唔到山腳,谷氣決定返屋企!連大粒佬都咁慘,咁打工仔,又可以點?」

林德信座駕爆胎

良心老闆仲有喺油麻地開咗間甜品店嘅羅鈞滿,噚日舖頭休息一日,佢回覆傳媒時話:「今朝六、七點轉三號風球時,我出過街,屯門公路好多塌樹,荃灣有啲路直情係俾成棵樹攔晒,根本就唔適合外出,更談不上去返工。」噚日受餘波影響嘅唔止打工仔,仲有林子祥個仔林德信,有讀者見到佢噚日上晝大概11點,佢架車喺元朗錦綉花園附近嘅馬路爆胎,最後要駛到附近油站搵人幫手先換到胎。

趙學而劈樹開路

張栢芝亦都好關心民生,噚日喺Ig留言話想幫被風球破壞了屋企嘅市民。而趙學而噚日就孖建築師老公蘇國基自發去劈樹開路,見佢老公拎住把刀仔就已經清咗一截路,相當厲害。不過,衛詩雅就唔多好彩,佢噚日貼咗張相話手臂俾石屎擊中,佢事後受訪講番意外經過依然好驚:「1點幾鐘屋企滲水,我、媽咪同家姐喺我間房做吸水工程,突然間石屎就冧落嚟,嗰刻我唔識反應,只係覺得有嘢壓住自己隻手,因為好驚,叫媽咪快啲離開我間房,推佢哋出去。」佢即刻洗傷口,見到成手都係血,仲話感覺似拍緊林超賢導演嘅災難片一樣。
撰文:馮仁昭

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載