蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年09月27日

【馮仁昭四圍超】入紙娶單文柔報同一個地址
陳展鵬聞婚前同居「乜年代呀?」

22,530

由陳惠敏擔任總監製嘅星輝娛樂國際集團有限公司,噚晚喺紅磡舉行晚宴。近排頻頻同未婚妻行孖咇搵銀嘅陳展鵬,噚晚就單拖現身,提到噚日佢同單文柔嘅「擬結婚通知書」,兩個人報稱同居,展鵬就話:「我冇留意呢單新聞喎,不過只係一個地址箒,只不過係用嚟登記。」

有好多細節未搞掂

問展鵬有冇計劃婚前同居,佢笑笑口話:「𠵱家乜嘢年代呀?」之後佢就話:「呢個係幾好嘅題材,將來可以攞嚟拍,我哋𠵱家好舒服、好自然,大家唔好聯想太多嘢。」講到會唔會搬番去同媽咪住?佢就話:「呢個太私隱,唔講喇,我哋仲有好多嘢要搞,等細節安排好再同大家講。」本來佢之前話過低調進行,點知佢口快快話:「我哋啲請帖已經派得七七八八,遲啲會公佈日子,總之會係喺10月中。」

韋家雄結婚嗌緊張

另外,下個星期六結婚嘅韋家雄,噚晚就同未婚妻Keynes十指緊扣現身,講到婚期進入倒數階段,佢哋話:「仲有一個禮拜,自己都諗唔到,越嚟越緊張。之前話畀大家聽準備得七七八八,𠵱家已經係八八九九。」唔知兄弟團又開咗會未呢?韋家雄話:「未呀,估唔到搞結婚真係咁忙,都未有時間,不過佢哋個個都冇得頂!非常冇得頂!都預咗班姊妹都係玩自己,預咗會醉囉!」
至於屆時「愛的宣言」方面,韋家雄就話:「未知呀,都係太太嗰邊寫嘅,但驚自己到時會緊張到喊。」佢仲話婚後會先到泰國探親,如果有時間會去埋日本同台灣食嘢,佢話:「我會放假放到下月22號,結完婚都要有時間唞一唞去玩吓行吓。」
撰文:馮仁昭

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載