› 選擇地區
三藩市
紐約
洛杉磯
其他美國地區
香港 台灣 北美
 
2018年09月27日

忙搵人仔失場被公審
小春還拖:咪咁銅臭

《黃金兄弟》內地票房報捷,前晚舉行慰勞宴,監製曾志偉勁開心。

由錢嘉樂執導、曾志偉監製,以及鄭伊健、陳小春、謝天華、林曉峰(阿Lo)和佘詩曼等主演的電影《黃金兄弟》前晚於元朗舉行慰勞宴。據了解,《黃》片於內地上映6天,票房已突破2.3億人民幣。而佘詩曼當晚落機後立即趕去慰勞宴,而且還豪爽地拿現金出來抽獎。

個唱冇預兄弟

不過,小春當晚成為眾矢之的,皆因連日來一班「黃金兄弟」不停去戲院謝票,但他就沒有出現,原來小春在內地搵銀,難怪被兄弟「公審」時,他尷尬說:「大家唔好咁銅臭味啦!因為11月開演唱會,得一個月時間去練歌同綵排,頭先先綵排完過嚟,把聲都沙晒。」
問小春會否邀兄弟們做嘉賓,他竟衝口而出:「冇機會㗎啦!𠵱家搞緊流程,睇吓可唔可以塞佢哋入去啦!」伊健聽完即刻投訴:「嘩!要塞我哋入去呀!」小春自知講錯說話,尷尬連說三次:「唔係。」接着再解畫:「塞入去唔代表唔好,大家唔係同一個經理人,夾時間好難,而且大家都好忙。」
問小春如何報答兄弟幫手謝票?伊健搶先說:「不如除衫啦!」錢嘉樂接着說:「唔使喇!佢繼續忙,我哋幫佢抽佣。」小春聽到「錢」字就反擊:「你哋唔好咁銅臭味啦!」各人你一言我一語,有人提議小春請兄弟歐遊,但小春卻一臉尷尬沒表態。此時志偉終於發功:「對小春嚟講,最煩惱係唔知啲錢點使。」更抵死借小春囝囝Jasper金句,拍拍小春話:「Don't angry.」

伊健送褸謝票

此外,談到伊健日前出席戲院謝票時除衫騷肌,他解釋:「唔係有心,嗰日見到觀眾講得實在太好,現場冇其他嘢送畀佢,冇理由唔送,所以除咗件風褸送畀佢,唔係特登除衫。」志偉即笑說:「我除褲啦!」
而導演錢嘉樂分別被成龍、洪金寶、元彪及袁和平大讚電影拍得好,他開心地說:「諗唔到佢哋一齊讚我,但亦好大壓力,今年中秋係我人生中得到最好嘅禮物。希望電影可以拍續集,志偉繼續做監製。」
採訪︰葉綠悠
攝影︰陳俊強

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載