› 選擇地區
三藩市
紐約
洛杉磯
其他美國地區
香港 台灣 北美
 
2018年09月27日

老公剪臍帶見血被嚇窒
利嘉兒誕7.2磅B女:幾肥美

利嘉兒(Lily)和劉姓製衣商人老公Bong於10年結婚,婚後八年終於造人成功,今年44歲的利嘉兒高齡懷孕,上星期三在舊山頂道嘉諾撒醫院誕下體重7.2磅女兒劉書雅,母女平安,女兒可愛圓碌碌似足利嘉兒老公,母女更趕及中秋前出院,第一次過三人中秋節,人月團圓。

蝦碌冇拍片

由於開刀日期撞正颱風「山竹」襲港之後,令利嘉兒擔心風災塌樹封路,幸好當時道路暢通順利入院。休息幾日後,利嘉兒自言精神不錯,講起初生女兒,她更是笑不攏嘴:「BB都幾肥美,屋企人都話冇諗過我咁細粒,生到個BB咁墜手。BB𠵱家食得、瞓得,好多表情,成日偷笑,姑娘話佢係開心果BB。」
當日利嘉兒由老公陪同入產房,老公更親手剪臍帶。利嘉兒爆老公曾被囡囡嚇一嚇:「好多蝦碌嘢,老公本來準備入到嚟就係剪臍帶,但啱啱見到醫生將BB喺我個肚拎出嚟個下,血淋淋嘅一幕,佢都有啲嚇親。」大概是因為驚魂未定,麻醉師又撳錯掣出事。利嘉兒說:「之後個外籍麻醉師話幫佢揸機,錄佢剪臍帶個part,點知剪完睇番係空白,原來佢撳錯掣,冇錄到,呢啲冇得take two,老公安慰我話唔緊要啦,咁珍貴嘅畫面,已經留咗喺佢腦中同心中。」

書卷氣名字

利嘉兒為女兒改名劉書雅,原來別具意義,她說:「中英文名都係我自己改,因為我鍾意女仔有書卷氣,希望佢係優雅嘅女仔。」至於女兒英文名Karyssa來自古希臘文,有充滿愛、被愛的意思。利嘉兒解釋:「我想佢有愛呢個特質,人生中充滿愛,亦明白愛人、有愛心及愛惜小動物。」
採訪:林妙萍

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載