› 選擇地區
三藩市
紐約
洛杉磯
其他美國地區
香港 台灣 北美
 
2018年10月06日

【娛樂人物】
事業停滯離婚打擊日喊夜喊
顏仟汶抑鬱心事

現年47歲的顏仟汶四年前因為愛犬逐一離世,爆出抑鬱症。在接受治療期間,事業發展未如理想,加上兩年前跟老公分居,仟汶的情緒再受到影響,波動很大,她腦海多次萌生做「儍事」,幸好最終捨不得老父,情緒得以冷靜下來。仟汶不敢停藥,現仍定期往覆診,因為她試過停藥後,病情回到起點。
採訪:比華利
攝影:陳俊強

相關新聞:【星途坎坷】全裸拍三級片

人生無常,人妻顏仟汶於四年前睡醒,突然不自主走近家中露台喪喊,那一天由上午一直哭足七小時,喊到「扯蝦」,她心中暗驚,主動向友人求救,友人勸她看醫生,翌日到瑪麗醫院急症室求診。仟汶日前接受《蘋果》專訪,重提往事:「我獨自去急症室登記分流,姑娘同我量血壓,我突然又喊,姑娘畀張輪椅推我埋一邊休息,叫我想喊就喊。」到她見醫生時,講到父母即跪低喊不停,醫生開藥再轉介她去精神科,每隔幾個月要定時覆診。

停藥兩個月險出事

仟汶表示那段日子家中多隻老狗逐一離世,可能是抑鬱症導火線,她去人多地方會有幻覺和幻聽:「有時我企10樓露台講電話,會望到自己瞓咗喺樓下。」醫生斷定她患上抑鬱症:「醫生話每個人大腦正常係一棵茂盛嘅樹,當腦退化會變啡色,即係唔健康,會諗好多負面嘢。」抑鬱症絕不可停藥,仟汶在兩年前到廣州開工,偷懶沒覆診兩次即出事:「停咗差唔多兩個月藥,排唔番期,先生陪我去求醫生畀期,真係冇籌,我去到又失控喊唔停,病情差咗。嗰度啲醫生見我唔掂,馬上叫白車送我入院。」
仟汶面對事業停滯,跟相戀15年的老公離婚,她又會鑽牛角尖:「好down時會扯咗好多嘢出嚟,左腦係天使,右腦係魔鬼,魔鬼出嚟,天使會同佢打仗,睇邊個鸁,魔鬼鸁,我咪匿埋喊發洩,喊完好啲。有時激動會開車兜吓,好想出去大嗌,出去淋雨。有衝動跳出去做儍嘢,我係戒咗安眠藥,但屋企仲有,好多次有念頭拎出嚟啪,嗰吓我覺冇存在價值,冇人明白我。」
跟前夫分居兩年,今年5月仟汶已簽紙離婚:「動筆嗰吓係有感覺嘅,唔捨得一定有,基本上好了解,大家磨合晒,行唔到落去係可惜,有嘗試可唔可以從頭嚟過,但返唔到轉頭。佢都拍拖啦,我祝福佢。」回復單身,仟汶獨居新界村屋,收養咗兩隻流浪貓為伴。

相關新聞:【走過幽谷】謝安琪與張繼聰同抗抑鬱

爸爸助過死亡邊緣

每次拉仟汶走過死亡邊緣,其實是她爸爸:「我好緊張爸爸,佢係我命根,爸爸睇報紙睇我啲新聞,即使自己個女光脫脫,佢一句都冇問,只係叫我錫自己多啲。我好唔開心時會搬個老竇出嚟,如果我……我覺得爸爸會好傷心。」不過仟汶卻早早向朋友交代「後事」:「我同好多親朋戚友講,如果有一日我唔喺度,你哋將我火化,撒去公園得㗎喇,唔好搞咁多嘢,有乜就嚟公園同我傾偈,唔使搞骨灰龕,靈堂唔使破地獄,播歌同拎projector播我同朋友啲相。」
仟汶望借今次訪問,鼓勵抑鬱症患者不要諱疾忌醫,更要勇敢面對:「唔好怕被標籤,唔係要人同情,係想畀人知,朋友可以幫到我。」看到患躁鬱症盧凱彤8月墮樓身亡,仟汶感慨萬千:「睇到好心酸,我明佢,抑鬱症病人思維冇人明,最大問題啲人覺得點解我哋有勇氣去死,冇勇氣生存,唔係我有勇氣去死,亦唔係我冇勇氣生存,我冇力呀。」如果身邊有患上抑鬱症患者,仟汶謂切忌向他們說「唔好唔開心」之類的安慰說話:「我好想日日都開心,咁我真係唔開心,點開心箒,朋友出於好意,但用錯方法。」

「只有自己幫到自己」

抑鬱症變成都巿病,仟汶覺得香港人生活步伐太忙:「香港地好誇張,手停口停,行得好快,我哋成日要人跟我哋step,應該我哋有問題,全世界冇一個地方似香港人咁黐線,係香港有問題,令好多人急趕。香港環境令情緒病人多咗,成日街上有人大嗌,梗有一個喺你左近,如果唔想咁,自己覺得有問題,要同好朋友傾吓,去睇醫生最好,只有自己幫到自己。」仟汶分享情緒差時,其實只需要朋友在身邊:「唔使出聲,拍吓,有句說話叫『講多錯多』,等佢哋明開心同唔開心都有朋友一齊已好足夠,大家都努力,加油。」
場地提供:The Stadium(CWB)

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載