› 選擇地區
三藩市
紐約
洛杉磯
其他美國地區
香港 台灣 北美
 
2018年10月12日

【姐匙Talk】香雞腳放生電得罪人

做娛樂圈呢行,最緊要人緣好,不過有啲半紅不黑嘅星,又要學人搞好啲人緣,又要選擇性咁做,仲要係對異性先至特別殷勤,其實咪即係唔識做人囉。
好似「香雞腳」咁恃住有幾分姿色,鬥靚就幾出位嘅,但人緣呢方面就極度負評。事關佢一夜成名之後,扮嘢懶巴閉咁都唔緊要,但工作上遇到啲同性,擺明同性相拒,人哋想同佢打吓交道,佢就冇乜反應不特止,仲唔多理人。相反佢對住啲異性,即兩眼發青光兼嗒晒糖,仲自動波送上門,驚死人哋唔再搵佢。
最重要係香雞腳好鍾意向異性放生電,不論人哋有女友、有老婆同仔女,最緊要發姣,佢呢種態度令到一班同性好唔鍾意佢,香雞腳莫講話人緣,連基本做人禮貌都冇。有次佢俾人刮到啲醜事,將唔係事實嘅嘢,當事實嚟講,點知俾人發現有問題,班同性即刻拍爛手掌嚟賀佢。

常犯低級錯誤

衰過之後,香雞腳雖然都有自我反省,不過佢就經常犯啲低級錯誤,搞到公司頭都痕。有次佢嘅硬膠好姊妹,帶埋佢上去朋友嘅公司,認識吓啲膠層,諗住搞好啲關係。但係香雞腳自把自為,事前又冇通知聲自己嘅經理人,去完之後俾經理人知道咗,香雞腳被急召返公司照肺,仲俾經理人鬧鑊甘,話佢私自行動,佢呢種唔識做人,經常得罪人嘅態度,想學人搞好啲人緣,睇怕都幾難。
撰文:Jessie
本欄逢周五刊登

姐匙Talk

我姐匙縱橫歌影視幕後,咁多年嚟冷眼旁觀,娛樂圈大小事都走唔過我雙眼,真係頂唔順要爆啦!歡迎大家嚟剝花生。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載